पांदण रस्त्यात कोट्यवधींचा भ्रष्टाचार; मंठा तालुक्यातील धक्कादायक प्रकार
मंठा (जि.जालना) : मंठा तालुक्यातील नानसी आणि मंगरूळ या दोन गावादरम्यानच्या मातोश्री पांदण रस्त्याच्या कामात मोठा गैरव्यवहार झाल्याचा गंभीर आरोप शेतकऱ्यांनी केला आहे. एकाच रस्त्यावर दोन्ही ग्रामपंचायतींनी काम दाखवून शासनाच्या निधीची विल्हेवाट लावल्याचे उघडकीस आले असून, या प्रकरणी ८ सप्टेंबर २०२६ रोजी शेतकऱ्यांनी जिल्हाधिकाऱ्यांकडे सखोल चौकशीसह कारवाईची दाद मागितली आहे.
तक्रारीनुसार, सन २०१८ मध्ये लोअर दुधना प्रकल्पाच्या यांत्रिकी विभागाकडून पाच किलोमीटर अंतराचा हा रस्ता मुरुमीकरण करून आधीच तयार करण्यात आला होता. तरीही याच रस्त्यावर मंगरूळ ग्रामपंचायतीने दोन किलोमीटर आणि नानसी ग्रामपंचायतीने दोन किलोमीटर असे चार किलोमीटरचे मातोश्री पांदण रस्त्याचे काम परस्पर दाखवले. एकाच रस्त्याची डावी व उजवी बाजू दाखवून कागदोपत्री दोन स्वतंत्र कामे मंजूर करून घेण्यात आली.
प्रत्यक्षात पाहणी केली असता रस्त्याचे काम जेमतेम अडीच किलोमीटर भरत असून, दीड किलोमीटरचे काम झालेच नसल्याचे शेतकऱ्यांचे म्हणणे आहे. तसेच रस्त्यावर दर किलोमीटरला १५ याप्रमाणे चार किलोमीटर अंतरासाठी एकूण ६० सिमेंट पाईप मंजूर असताना, प्रत्यक्षात जागेवर एकही पाईप टाकलेला नाही. माहिती अधिकारात काढलेल्या कागदपत्रांमध्ये मूळ नस्तीत जिओ टॅगिंगचे फोटो, माहिती फलकाचे छायाचित्र, तहसीलदार तसेच कृषी अधिकाऱ्यांचे नाहरकत प्रमाणपत्र उपलब्ध नाही. एवढेच नव्हे, तर संमतीपत्रावर दुसऱ्याच शेतकऱ्यांची नावे व स्वाक्षऱ्या असून अनेक कागदपत्रांवर केवळ कोऱ्या पानांवर सह्या-शिक्के मारल्याचे दिसून आले आहे.
या गैरव्यवहाराबाबत उपमुख्य कार्यकारी अधिकारी आणि गटविकास अधिकाऱ्यांनी पूर्वी चौकशी आदेश दिले होते. मात्र, स्थानिक समितीने घटनास्थळी कोणतीही पाहणी केली नाही. ग्रामसेवक, इंजिनिअर व कंत्राटदाराने संगनमत करून कोणतीही प्रत्यक्ष पाहणी न करता बिले काढल्याचा आरोप शेतकऱ्यांनी केला आहे. कामाची प्रत्यक्ष जागेवर मोजणी करून संबंधित दोषी अधिकारी व कर्मचाऱ्यांवर निलंबनाची कारवाई करावी, अन्यथा तीव्र आंदोलन छेडण्याचा इशारा ज्ञानोबा निर्वळ, जायकू निर्वळ, रंगनाथ निर्वळ, अशोक निर्वळ, आबासाहेब निर्वळ, डिगांबर निर्वळ, दत्तराव निर्वळ, दिलीप निर्वळ यांच्यासह परिसरातील संतप्त शेतकऱ्यांनी दिला आहे.
