आप्पा महाराज भुसारे : हेलस येथील श्रीकालिकादेवीच्या यात्रा महोत्सवास भक्तिमय वातावरणात सुरूवात
हेलस जि.जालना : मंठा शहरापासून जवळच असलेल्या हेलस (ता.मंठा) येथील प्राचीन हेमाडपंथी श्री कालिकादेवी मंदिर संस्थानच्या वतीने आयोजित सोमवंशी क्षत्रिय कासार समाजाच्या वतीने कुलस्वामिनी श्री कालिकादेवीच्या ४३ व्या यात्रा महोत्सवाला, शुक्रवारी, २० मार्चपासून भक्तिमय वातावरणात सुरुवात झाली आहे.
गावातून मंगल कलश यात्रा व देवीची पारंपरिक मिरवणूक काढण्यात आली. सकाळी नऊ वाजता सिंहासनावर श्री देवी विराजमान झाला. पंडित महावीर आहेर भोगाव देवी आणि पंडित सुरेश लोखंडे, लाड कारंजा यांच्या नेतृत्वाखाली महाभिषेक, चढाव, संगीतमय महापूजा, महाआरती झाली. विनोद कापसे यांनी साथसंगत दिली. संस्थानचे अध्यक्ष सतीश तळणीकर, बबनराव हेलसकर, उपाध्यक्ष तथा पुजारी सुभाष दहिभाते, सचिव बाबासाहेब हेलसकर, बालासाहेब दहिभाते यांची उपस्थिती होती.
दुपारी हरहर महादेव वारकरी शिक्षण संस्थेचे आप्पा महाराज भुसारे यांचे कीर्तन झाले. कुळीची ही कुळदेवी, केली ठायी संता, बरवे झाले शरण गेलो’ या संत तुकाराम महाराज यांच्या अभंगावर बोलताना भुसारे महाराज यांनी ईश्वराप्रती असलेली भक्ती आणि संतांचे मार्गदर्शन मानवी जीवनासाठी अत्यंत मोलाचे आहे. भक्तीचा हा मार्ग अनुसरताना कुळाच्या परंपरा आणि कुलदेवीचे महात्म्य जपत ईश्वराचे नामस्मरण करावे, वाणी गोड ठेवावी. मी पणाचा त्याग करावा, असे नमूद केले.
शेकडो भाविकांनी महाप्रसाद घेतला. सायंकाळी सहा वाजता श्री हरहर महादेव वारकरी शिक्षण संस्था, हेलसचे संचालक आप्पा महाराज भुसारे नेतृत्वाखाली हरिपाठानंतर सायंकाळी देवीचा छबिना उत्सव, आरती झाली. २१ मार्चरोजी समाजभूषण माणिक महाराज मांगुळकर यांचे कीर्तन आहे. महोत्सवाची सांगताप्रसंगी देवीदास महाराज ढोके यांचे रविवारी २२ मार्च रोजी प्रवचन आहे. महाप्रसादाने सांगता होईल. विदर्भ, मराठवाड्यासह पंचक्रशीतील भाविकांनी यात्रेत मोठ्या संख्येने सहभागी झाले आहेत. २०२७ च्या वार्षिक यात्रोत्सवातील आराधना महाप्रसाद व अन्य सेवांसाठी भाविकांनी यात्रा कार्यालयात नोंदणी करावी, असे आवाहन करण्यात आले आहे. यशस्वीतेसाठी पदाधिकारी, सदस्य , नवयुवक, महिला मंडळ व ग्रामस्थ परिश्रम घेत आहे.
