एसबीआय एटीएम मशीनला पोदार जंबो किड्सच्या विद्यार्थ्यांची शैक्षणिक भेट
जिंतूर : विद्यार्थ्यांना व्यवहारज्ञान आणि बँकिंग व्यवहारांची प्राथमिक माहिती मिळावी या उद्देशाने पोदार जंबो किड्स येथील विद्यार्थ्यांनी स्टेट बँक ऑफ इंडियाच्या एटीएम मशीनला शैक्षणिक भेट दिली. या भेटीदरम्यान विद्यार्थ्यांना एटीएम मशीनचा उपयोग, पैसे काढण्याची प्रक्रिया आणि सुरक्षित व्यवहार कसे करावेत याविषयी ५ फेब्रुवारी २०२६ रोजी मार्गदर्शन करण्यात आले.
शिक्षकांच्या मार्गदर्शनाखाली विद्यार्थ्यांनी एटीएम मशीनचे कार्य प्रत्यक्ष पाहिले. एटीएम कार्डचा वापर, पिन नंबरचे महत्त्व आणि बँक व्यवहार करताना घ्यावयाची काळजी याबाबत विद्यार्थ्यांना सोप्या भाषेत माहिती देण्यात आली. या शैक्षणिक उपक्रमामुळे विद्यार्थ्यांमध्ये बँकिंग व्यवहारांविषयी मोठी उत्सुकता निर्माण झाली होती.
या वेळी शाळेच्या प्राचार्या आशा दराडे आणि शिक्षकांनी विद्यार्थ्यांना आधुनिक तंत्रज्ञानाशी परिचित करून देण्याचा हा उपक्रम अत्यंत उपयुक्त ठरेल, असा विश्वास व्यक्त केला. विद्यार्थ्यांनीही या भेटीचा आनंद घेत बँकिंग प्रक्रियेबाबत महत्त्वाची माहिती आत्मसात केली. या नाविन्यपूर्ण उपक्रमाचे पालकांमधून कौतुक होत आहे.
