मंगरुळपीर शहरातील घटना
वाशिम : मंगरुळपीर शहरात रात्रीच्या सुमारास एका घरात चोरट्यांनी घुसून कुटुंबीयांना मारहाण करत रोख रकमेसह सोन्या-चांदीचे दागिने असा तब्बल ५ लाख ८७ हजार ७०० रुपयांचा मुद्देमाल जबरदस्तीने घेऊन गेल्याची तक्रार मंगरुळपीर पोलिस ठाण्यात दाखल करण्यात आली आहे. या घटनेत पतीला काठीने मारहाण करून गंभीर दुखापत केल्याचा तसेच कुटुंबीयांना जीवे मारण्याची धमकी दिल्याचा आरोप करण्यात आला आहे.
पोलिस ठाण्यात दाखल झालेल्या नोंदीनुसार, संबंधित कुटुंबीय रात्री घरात झोपले असताना संशयित व्यक्तींनी घराच्या दरवाजाची कडी उघडून घरात प्रवेश केला. त्यानंतर घरातील व्यक्तींना धाक दाखवत मारहाण करण्यात आल्याचे तक्रारीत नमूद आहे. रात्रीच्या सुमारास घरात गोंधळाचा आवाज झाल्यानंतर कुटुंबातील सदस्यांनी जागे होऊन पाहिले असता संशयित व्यक्ती घरात असल्याचे निदर्शनास आले.तक्रारीनुसार, संशयितांनी पतीला काठीने मारहाण केली. तसेच कुटुंबातील महिलांसह इतर सदस्यांना चाकू/काठीचा धाक दाखवत धमकावले. यावेळी घरातील रोख रक्कम आणि सोन्या-चांदीचे दागिने जबरदस्तीने घेण्यात आल्याचा आरोप आहे.पोलिस नोंदीतील तक्रारीनुसार, घरातून रोख ५ लाख रुपये, तसेच सोन्याचा हार, लेडीज अंगठी, जेन्ट्स अंगठी, लहान मुलाची अंगठी आदी मिळून सुमारे २७ ग्रॅम सोन्याचे दागिने आणि चांदीचे पैंजण असा ऐवज नेण्यात आल्याचे नमूद आहे. या सर्व मुद्देमालाची एकूण किंमत सुमारे ५ लाख ८७ हजार ७०० रुपये असल्याचे तक्रारीत नमूद करण्यात आले आहे.घटनेनंतर संशयितांनी कुटुंबीयांना जीवे मारण्याची धमकी देत घटनास्थळावरून पळ काढल्याचे तक्रारीत म्हटले आहे. या घटनेमुळे परिसरात खळबळ उडाली आहे.पोलीसांनी अज्ञात सात आरोपीविरुध्द विविध कलमान्वये गुन्हे दाखल केले आहेत.*मंगरुळपीर पोलिसांकडून तपास सुरू*घटनेची माहीती मिळताच पोलिस घटनास्थळी तात्काळ पोहचुन पंचनामा केला.श्वानपथकालाही प्राचारण करण्यात आले होते.घटनास्थळी पोलिस अधिक्षक,ऊपविभागिय पोलिस अधिकारी,ठाणेदार मंगरुळपीर ,एलसिबी पथक यांनी भेट देवुन घटनेविषयी सविस्तर माहीती घेतली.या प्रकरणी मंगरुळपीर पोलिस ठाण्यात तक्रार दाखल करण्यात आली असून, पोलिसांनी घटनेची नोंद घेत तपास सुरू केला आहे.पुढील तपास पोलिस करत आहेत.
