माजी आमदार बाबाजानी दुर्राणी : नगर परिषद निवडणुकीसाठी सज्ज राहा
सेलू नगरपरिषदेसाठी इच्छुक उमेदवार व कॉंग्रेस पदाधिकाऱ्यांची बैठक
सेलू : काँग्रेस पक्षाचे विचार घरोघरी पोहोचवून आगामी नगर परिषद निवडणुकीसाठी सज्ज राहण्याचे आवाहन कॉंग्रेसचे परभणी ग्रामीण जिल्हाध्यक्ष तथा माजी आमदार बाबाजानी दुर्राणी यांनी केले. सेलू येथील साईबाबा बँकेत इच्छुक उमेदवार व शहर काँग्रेस कमिटीची बैठक शनिवारी १ नोव्हेंबर २०२५ रोजी सायंकाळी आयोजित करण्यात आली होती. यावेळी व्यासपीठावर तालुका काँग्रेस अध्यक्ष हेमंतराव आडळकर आणि माजी नगराध्यक्ष पवन आडळकर यांची उपस्थिती होती. याप्रसंगी दुर्राणी यांचा सत्कार करण्यात आला.
यावेळी बोलताना माजी आमदार बाबाजानी दुर्राणी म्हणाले की, येणाऱ्या सर्व निवडणुका काँग्रेस आणि समविचारी पक्ष मिळून लढतील. जातीयवादी पक्षाला आता थारा नाही. जनता कंटाळली आहे. भाजप दररोज कुठे ना कुठे जातीय तेढ निर्माण करून मताची विभागणी करत आहे. आता काँग्रेस पक्ष परभणी जिल्ह्यात पूर्ण ताकदीने लढा देणार असून निर्णायक परिणाम मिळतील. ‘वोट चोरी’चा मुद्दा काँग्रेसचे नेते खासदार राहुल गांधी यांच्या नेतृत्वाखाली जनआंदोलनाच्या माध्यमातून जनतेपर्यंत पोहोचला आहे. त्यांनी कार्यकर्त्यांना सांगितले की, काँग्रेसचे विचार व नीती घरोघरी पोहोचवावी, जेणेकरून जनतेला खरे काय आहे हे कळेल. काही ठिकाणी उमेदवारीबद्दल तिढा असेल, तर त्या ठिकाणी चर्चा करून योग्य न्याय देण्याचा प्रयत्न करू.
या बैठकीत माजी नगराध्यक्ष पवन आडळकर, माजी नगरसेवक संभाजी पवार, विनोद तरटे, मुश्ताक अहेमद, रहीम इरफान जमीनदार, मिलिंद पवार, योगेश कुलकर्णी, नृसिंह हरणे, सुदर्शन शेरे, अमजद बागवान, शेख दिलावर, इमत्याज अली, मुश्ताक रब्बानी, खाजाभाई, शेख साजिद, अन्वर शेख, सय्यद जफर अली व काँग्रेस पक्षातील आजी-माजी नगरसेवक, पदाधिकारी व सहकारी उपस्थित होते.
