कीर्ती राऊत यांचे प्रतिपादन, स्वातंत्र्यसैनिक विनायकराव चारठाणकर यांना स्मृती दिनानिमित्त अभिवादन
सेलू : स्वातंत्र्यसेनानी विनायकराव चारठाणकर यांनी निजामाच्या जुलमी राजवटी विरोधात संघटनात्मक लढाई उभी करून निजामाच्या बारीक-सारीक हालचालींवर नजर ठेवून त्यांचे मनसुबे उधळून लावले. निजामांना हद्दपार करण्यासाठी सशस्त्र लढा दिला. हैदराबाद मुक्ती संग्रामात विनायकरावांचे योगदान अतुलनीय आणि मोलाचे आहे. हैदराबाद मुक्ती संग्राम आणि विनायकराव चारठाणकर हे समीकरण झाले होते, असे प्रतिपादन नूतन कन्या प्रशालेतील सहअध्यापिका कीर्ती राऊत यांनी केले.
‘एक दिवस एक पुस्तक’ या उपक्रमांतर्गत विनायकराव चारठाणकर यांच्या जीवनचरित्रावर कीर्ती राऊत यांनी १ नोव्हेंबर शनिवारी स्वातंत्र्यसैनिक विनायकराव चारठाणकर स्मृती दिनानिमित्त श्रीमती राऊत यांनी विवेचन केले.श्रीमती राऊत म्हणाल्या की, मराठवाड्यातील निजामशाहीची दहशत आणि जुलमी राजवट उलथून टाकण्यासाठी अनेकदा संघर्ष आणि लढा दिला गेला. मराठवाड्यातील पूर्वीच्या ५ जिल्ह्यांत निजामाचे रझाकारांनी हैदोस घातला होता. स्त्रियांना त्रास देणे, हिंदूंच्या देवतांची विटंबना आणि नासधूस करण्याचे प्रकार होत होते. या सर्व अत्याचाराला सडेतोड उत्तर दिले पाहिजे. या दृष्टीने काही निवडक व्यक्तींनी एकत्र येत हैदराबाद मुक्ती संग्रामात प्रत्येकाने स्वतःच्या हिमतीवर लढले पाहिजे, यावर एकमत झाले. यामध्ये विनायकराव अग्रभागी होते.
यावेळी सुरेश हिवाळे म्हणाले की, पालकाने आपल्या पाल्यांना घडवण्यासाठी एक आदर्श म्हणून ‘इंदिरेस पत्र’ या पुस्तकाकडे पाहावे आणि आपल्या पाल्यास ‘इंदिरास पत्र’ हे पुस्तक अवश्य वाचण्यास द्यावे. ‘इंदिरेस पत्र’ हे पुस्तक आजच्या काळात विद्यार्थ्यांसाठी संजीवनी आहे. स्वामी रामानंद तीर्थ हिंदी मराठी ग्रंथालय या ठिकाणी ‘एक दिवस एक पुस्तक’ या उपक्रमांतर्गत ‘इंदिरेस पत्र’ या पुस्तकाचे विवेचन करताना सुरेश हिवाळे बोलत होते.
व्यासपीठावर अध्यक्षस्थानी स्वामी रामानंद तीर्थ हिंदी मराठी ग्रंथालयाचे अध्यक्ष महेश खारकर, सुरेश हिवाळे, किर्ती राऊत यांची उपस्थिती होती. कार्यक्रमाची सुरुवात भारताचे पहिले पंतप्रधान पंडित जवाहरलाल नेहरू आणि थोर स्वातंत्र्यसेनानी विनायकराव चारठाणकर यांच्या प्रतिमा पूजनाने झाली. कार्यक्रमाचे प्रास्ताविक ग्रंथालयाचे सचिव चंद्रशेखर मुळावेकर यांनी केले. कार्यक्रमाचे सूत्रसंचालन सुरेश उगले यांनी केले, तर आभार रामराव गायकवाड यांनी मानले. या कार्यक्रमासाठी किरण कुंडीकर, रमेश बोराडे, वसंत पांचाळ, बाबासाहेब चारठाणकर यांच्यासह वाचक सभासद उपस्थित होते.
