आर.पी.हॉस्पिटलची किमया; पालकांनी मानले डॉक्टरांचे आभार
परभणी : वयाच्या ३५ व्या वर्षी बहिरेपणाच्या समस्येने ग्रासलेल्या एका तरुणाची श्रवणशक्ती परभणी येथील आर. पी. हॉस्पिटलमधील तज्ज्ञ डॉक्टरांच्या कौशल्यामुळे परत मिळाली आहे.
परभणी येथील हा तरुण बऱ्याच दिवसांपासून कानातून पू व पाणी येणे, सतत कान दुखणे आणि ऐकू कमी येणे या त्रासाने त्रस्त होता. दुर्बिणीतून (Endoscopy) व ऑडिओमेट्री विभागात तपासणी केल्यानंतर रुग्णाला फक्त १०% ऐकता येत असल्याचे निष्पन्न झाले. उपचारांच्या वाढत्या खर्चाला कंटाळून रुग्ण विविध खासगी रुग्णालयांमध्ये फिरत होता; परंतु त्याला कुठेही पुरेसा दिलासा मिळाला नाही.अखेर, आर. पी. हॉस्पिटलचे कान, नाक, घसा तज्ज्ञ डॉ. मो. फैज उर रहमान यांनी या रुग्णावर दोन टप्प्यांत अत्यंत क्लिष्ट शस्त्रक्रिया यशस्वीरीत्या पूर्ण केली. पहिल्या टप्प्यात एका कानात नवीन कृत्रिम पडदा बसविण्यात आला. त्यानंतर दोन महिन्यांच्या अंतराने दुसऱ्या कानाची शस्त्रक्रिया यशस्वी पार पडली. आर. पी. हॉस्पिटलमधील अत्याधुनिक यंत्रसामग्रीमुळे ही शस्त्रक्रिया यशस्वी झाली.रुग्णाची आर्थिक परिस्थिती लक्षात घेऊन आर. पी. हॉस्पिटलने ही शस्त्रक्रिया अत्यल्प दरात पूर्ण केली. यामुळे रुग्णाच्या पालकांनी आमदार डॉ. राहुल पाटील यांच्या घरी जाऊन त्यांचा सत्कार केला व आभार मानले.परभणी शहरात अशा प्रकारच्या उच्चस्तरीय शस्त्रक्रिया अत्यंत अल्प दरात उपलब्ध करणे हे सामाजिक बांधिलकी म्हणून आमचे कर्तव्य आहे. समाजातील रुग्णाला नवीन आयुष्य देण्याचे मोलाचे कार्य करणाऱ्या संपूर्ण टीमचे मी अभिनंदन करतो, अशी प्रतिक्रिया आमदार डॉ. राहुल पाटील यांनी दिली.
