नूतन विद्यालयात आषाढी एकादशी निमित्त कार्यक्रम; किशोरी खवणेचे सुश्राव्य कीर्तन ठरले लक्षवेधी
सेलू : आषाढी एकादशी निमित्त सेलू येथील नूतन विद्यालयाच्या संगीत विभागाच्या वतीने शुक्रवारी, २४ जुलै २०२६ रोजी सायंकाळी आयोजित ‘संतवाणी’ या विशेष कार्यक्रमात बाळ गोपाळांनी सादर केलेल्या संतांच्या रचनांनी श्रोते भक्तिरसात चिंब झाले.
कार्यक्रमाची सुरुवात ‘जय जय राम कृष्ण हरी’ जयघोषाच्या समूह गजराने झाली. संस्थेचे अध्यक्ष डॉ.एस.एम.लोया, सचिव प्राचार्य डॉ.व्ही.के.कोठेकर, शालेय समिती अध्यक्ष सीताराम मंत्री, दत्तराव पावडे, मुख्याध्यापक एस.व्ही.पाटील यांच्या हस्ते श्री विठ्ठल प्रतिमेचे पूजन झाले. संगीत शिक्षक सच्चिदानंद डाखोरे यांच्या मार्गदर्शनाखाली झालेल्या या कार्यक्रमात ‘रुप पाहता लोचनी’ (संत ज्ञानेश्वर) आणि ‘सुंदर ते ध्यान’ (संत तुकाराम) या समूह रचनांनी भक्तिमय वातावरणाची निर्मिती केली. भक्ती शिंदे हिने ‘ऊस डोंगा परी’ (संत चोखामेळा), गीत राठोड व नलिनी खंदारे यांनी ‘जाता पंढरीशी’ (संत सेना), तर श्रुती बोकन हिने ‘नको देवराया’ (संत कान्होपात्रा) ही रचना सादर करून उपस्थितांची मने जिंकली. वैभवी कुलकर्णी, ज्ञानेश्वरी शिंदे, अनुष्का परदेशी, अनुवेद घांडगे, मुंगीकर आणि पानझाडे यांनी एकत्रितपणे ‘टाळ बोले चिपळीला’ ही रचना सादर केली.
कार्यक्रमात किशोरी खवणे हिचे सुश्राव्य कीर्तन आणि शौर्य फटाले याची श्री विठ्ठल वेशभूषा विशेष लक्षवेधी ठरली. अनुष्का वाघ हिने ‘कानडा राजा पंढरीचा’ हे भक्तिगीत सादर केले. सानवी शिंदे हिने ‘देवाचिये द्वारी’ (संत ज्ञानेश्वर), ज्ञानाई खवणे हिने ‘अमृताहुनी गोड’ (संत नामदेव), वैष्णवी बोठे हिने ‘खेळ मांडियेला’ (संत तुकाराम), कृष्णा पवार याने ‘कांदा मुळा भाजी’ (संत सावता) आणि श्रुती कुलकर्णी हिने ‘ये गं ये गं विठाबाई’ (संत जनाबाई) या रचनांचे सुंदर सादरीकरण केले. तसेच राधिका परदेशी हिने ‘घागर घेऊन निघाली’ (संत एकनाथ), प्रज्योत पांचाळ याने ‘दिंडी चालली चालली’ (पारंपरिक) आणि ऋतुजा महाजन हिने ‘अरे कृष्णा अरे कान्हा’ (संत एकनाथ), स्वानंद डाखोरे या चिमुकल्याने संत नामदेव यांची “तीर्थ विठ्ठल क्षेत्र विठ्ठल ” रचना सादर करून लक्ष वेधले. श्री.डाखोरे यांनी सादर केलेल्या भैरवी भजनाने सांगता झाली.
कार्यक्रमाचे नेटके निवेदन सान्वी हेलसकर आणि मृण्मयी ईक्कर यांनी केले. तबल्यावर आनंद राऊत, पखवाज, मृदंगावर नागनाथ खवणे आणि टाळावर कार्तिक सातपुते यांनी सुरेल साथसंगत केली. मान्यवरांनी कौतुक केले. सांस्कृतिक विभाग प्रमुख काशिनाथ पल्लेवाड यांनी आभार मानले. कार्यक्रमास संस्थेचे सहसचिव जयप्रकाश बिहाणी, राजेश गुप्ता, मकरंद दिग्रसकर, प्रशासकीय अधिकारी प्राचार्य डॉ.शरद कुलकर्णी आदींसह श्रोते मोठ्या संख्येने उपस्थित होते.
