वारंवार होणाऱ्या अपघातांच्या पार्श्वभूमीवर नगर परिषदेत नागरिकांचे निवेदन
सेलू : शहरातील खंडोबा मंदिर, रहेमान नगर, शंभू नगर, गणेश नगर व शिवाजी नगर भागातून बोर्डीकर कृषी महाविद्यालयाकडे जाणाऱ्या ५० फुटी सिमेंट रस्त्यावर तातडीने गतिरोधक (स्पीड ब्रेकर) बसवावेत, या मागणीसाठी नगर परिषद कार्यालयात निवेदन देण्यात आले.
या मार्गावर मॉडर्न इंग्लिश स्कूल व यशवंत ज्युनिअर कॉलेजसह अनेक वसाहती येत असल्याने विद्यार्थी, पालक व नागरिकांची दररोज मोठ्या प्रमाणावर वर्दळ असते. तसेच या रस्त्यावरून लहान व अवजड वाहनांची वेगाने ये-जा सुरू असल्याने अपघातांचे प्रमाण वाढले आहे. ७ ऑगस्ट २०२६ रोजी याच रस्त्यावर दोन वाहनांचा अपघात होऊन दोन व्यक्ती गंभीर जखमी झाल्या असून त्यांच्यावर रुग्णालयात उपचार सुरू आहेत.भविष्यातील संभाव्य अपघात टाळण्यासाठी या रस्त्यावर फायबर किंवा सिमेंट काँक्रीटचे गतिरोधक बसवणे अत्यंत गरजेचे आहे. या मागणीबाबत नगर परिषद कार्यालयात अंकुश जाधव यांना १३ ऑगस्ट २०२६ रोजी निवेदन सादर करण्यात आले.या वेळी एम. आर. शेख, मझर शेख, शमशोदिन शेख, नसरुल्ला खां, खलील खान, अब्दुल मजीद आणि इब्राहिम बेग यांच्यासह परिसरातील नागरिक उपस्थित होते.
