एस.टी.प्रवर्गातून आरक्षणाची अंमलबजावणी करण्याची मागणी
जिंतूर : महाराष्ट्रातील धनगर समाजाचा संविधानात ३६ व्या क्रमांकावर समावेश आहे. त्यामुळे, धनगर समाजाला अनुसूचित जमातीच्या (एस.टी.) सवलतीची अंमलबजावणी करून ‘एस.टी.’ चे प्रमाणपत्र देण्यात यावे, या मागणीसाठी जिंतूर येथील अण्णा भाऊ साठे पुतळ्याजवळ सकल धनगर समाजातर्फे आज जोरदार रस्ता रोको आंदोलन करण्यात आले. या मागणीसाठी जालना येथील मल्हारयोद्धा दीपक भाऊ बोऱ्हाडे यांचे आमरण उपोषण सुरू आहे. आज त्यांच्या उपोषणाचा १५ वा दिवस आहे.
या उपोषणाच्या समर्थनार्थ यापूर्वी आमदार, खासदार यांच्या घरासमोर ढोल वाजवून धरणे आंदोलन करण्यात आले होते. आज, १ ऑक्टोबर २०२५ रोजी जिंतूरमध्ये भव्य रस्ता रोको व चक्काजाम आंदोलन करण्यात आले. आंदोलकांनी आरक्षणाचा भंडारा उधळून रस्ता रोको केला. यावेळी समाजाच्या ज्येष्ठ कार्यकर्त्यांसह युवकांनी समयोचित मार्गदर्शन केले. शासनाने संविधानात नमूद असलेल्या एस.टी. च्या सवलतीची त्वरित अंमलबजावणी करून धनगर समाजाची दशा संपवावी आणि त्यांना ताठ मानेने जीवन जगण्याची नवी दिशा द्यावी, अशी अपेक्षा सकल समाजाच्या वतीने कार्यकर्त्यांनी व्यक्त केली.
सेलूत ढोल बजाओ आंदोलन
सेलू : पालकमंत्री मेघना साकोरे-बोर्डीकर यांच्या सेलू शहरातील पाथरी रोडवरील निवासस्थानासमोर सोमवारी (दि.२९) सकाळी ११ ते दुपारी ०३ वाजेपर्यंत सकल धनगर समाजाच्या वतीने ‘ढोल बजाव’ आंदोलन करण्यात आले. या आंदोलनात भागवत दळवे, प्रकाश मुळे, विजय दळवे, आनंद डोईफोडे, दामोधर दळवे, सोपान हारके, विठ्ठल महाराज कारके, रामप्रसाद थटवले, रामेश्‍वर खेपळ, माणिक हिंगे, विनोद शिंदे, धनंजय थटवले यांच्यासह तालुक्यातील सकल धनगर समाज बांधव मोठ्या संख्येने उपस्थित होते. आंदोलनादरम्यान माजी आमदार बोर्डीकर यांच्या मार्फत पालकमंत्री मेघना साकोरे-बोर्डीकर यांना धनगर समाजाच्या मागण्यांचे निवेदन देण्यात आले. धनगर समाजासाठी घटनादत्त आरक्षणाची तात्काळ अंमलबजावणी करण्यात यावी, तसेच धनगर समाजाचे संविधानिक अनुसूचित जमाती (एसटी) आरक्षण लागू करण्यात यावे, अशी मागणी करण्यात आली.
