धारासुर फाटा ते धारासुर रस्त्याचे काम करण्याची मागणी
परभणी : गंगाखेड मतदारसंघातील धारासुर फाटा ते धारासुर गावाकडे जाणाऱ्या सात किलोमीटर मुख्य रस्त्यापैकी उर्वरित पाच किलोमीटर रस्त्याचे काम तातडीने सुरू करण्याची मागणी धारासुर ग्रामस्थांनी आमदार रत्नाकर गुट्टे यांच्याकडे केली. या रस्त्यासाठी मुख्यमंत्री सडक योजनेतून सुमारे ६ कोटी रुपयांचा निधी मंजूर झाला होता. परंतु, संबंधित कंत्राटदाराने काम अर्धवट सोडल्याने गावकऱ्यांची मोठी गैरसोय होत आहे.
त्यामुळे हे काम पुन्हा ई-टेंडर काढून नवीन कंत्राटदाराकडून लवकर पूर्ण करण्यात यावे, अशी विनंती गावकऱ्यांनी आमदार गुट्टे यांना केली. यासोबतच, गुप्तेश्वर मंदिर परिसरात भाविक आणि पर्यटकांसाठी मंजूर झालेल्या ७८.४४ लाख रुपयांच्या जनसुविधा केंद्राचे कामही तातडीने सुरू करावे, अशी मागणी त्यांनी केली.
आमदार गुट्टे यांनी ग्रामस्थांचे म्हणणे ऐकून घेतले आणि या दोन्ही प्रश्नांवर सकारात्मक प्रतिसाद दिला. त्यांनी लगेच पुरातत्व विभागाचे सहायक संचालक अमोल गोटे, तहसीलदार गंगाखेड आणि संबंधित कंत्राटदाराच्या प्रतिनिधींना सोमवारी उपविभागीय अधिकारी कार्यालयात होणाऱ्या बैठकीत उपस्थित राहण्याचे निर्देश दिले.
यावेळी धारासुर गावचे सरपंच राजेभाऊ गवळे यांच्यासह प्रताप कदम, शेषराव कदम, सुरेश जाधव, कुलदीप जाधव, ज्ञानेश्वर जाधव, निवृत्ती कदम, जयराम कदम, अक्षय जाधव, भगवान जाधव, राजेभाऊ कदम, प्रतीक कदम, गणेश कदम, लक्ष्मण कदम, दिनेश जाधव, संभाजी ढेंबरे, पोलीस पाटील प्रतीक कदम, सुरेश कदम, बाळू रणबावरे, संभाजी ढेंबरे, दीपक कदम, हनुमान क्षिरसागर, बाळू कदम, कृष्णा कदम, कैलास कदम, मनोज कदम, अंगद कदम, राजेभाऊ डिळेकर, सर्जेराव कदम, नारायण शिंदे, बालासाहेब नेमाने, बालु काका जाधव आणि गावातील इतर अनेक नागरिक उपस्थित होते.
