सेलूतील प्रशिक्षणात निर्णय अधिकारी शोभादेवी जाधव यांचे आदेश
सेलू : जिल्हा परिषद आणि पंचायत समिती सार्वत्रिक निवडणूक २०२६ अंतर्गत सेलू तालुक्यातील निवडणुकीसाठी प्रशासन सज्ज असून, मतदान प्रक्रिया सुरळीत पार पाडण्यासाठी नियुक्त अधिकारी व कर्मचाऱ्यांनी आपले कर्तव्य अचूकपणे पार पाडावे. कामात कुठलीही टाळाटाळ खपवून घेतली जाणार नाही, असे स्पष्ट आदेश निवडणूक निर्णय अधिकारी शोभादेवी जाधव यांनी दिले आहेत.
शनिवारी, २४ जानेवारी रोजी सेलू येथील साई नाट्य मंदिरात दोन सत्रात मतदान केंद्राध्यक्ष आणि अधिकाऱ्यांचे पहिले प्रशिक्षण उत्साहात पार पडले. यावेळी मार्गदर्शन करताना शोभादेवी जाधव बोलत होत्या. ही निवडणूक प्रक्रिया राज्य निवडणूक आयोग आणि जिल्हाधिकारी संजयसिंह चव्हाण यांच्या मार्गदर्शनाखाली राबविली जात आहे. या प्रसंगी सहायक निवडणूक निर्णय अधिकारी तथा तहसीलदार डॉ. शिवाजी मगर, नायब तहसीलदार जयश्री कोल्हे आणि विजय मोरे यांची प्रमुख उपस्थिती होती.
डॉ. मगर यांनी सादरीकरणाद्वारे मतदान प्रक्रिया, यंत्रांचे सिलिंग, अभिरूप मतदान आणि केंद्राध्यक्षांच्या जबाबदाऱ्यांची सविस्तर माहिती दिली. प्रत्येकाने नैतिक वर्तनाचे पालन करून जबाबदारीने काम करावे, असे निर्देश त्यांनी दिले. या प्रशिक्षणासाठी सहायक महसूल अधिकारी हरिष टाक, अशोक राऊत, प्रताप शेरे, शेख नूर आणि विजय सोंजे यांनी परिश्रम घेतले. प्रशिक्षणास नियुक्त ७२२ पैकी ६७० कर्मचारी उपस्थित होते, तर ५२ अनुपस्थित कर्मचाऱ्यांना नोटीस बजावण्यात आली आहे.
निवडणुकीचे दुसरे प्रशिक्षण ३० जानेवारी रोजी, तर तिसरे व अंतिम प्रशिक्षण ४ फेब्रुवारीला होईल. त्यानंतर ५ फेब्रुवारी रोजी सकाळी ७:३० ते सायंकाळी ५:३० या वेळेत मतदान पार पडेल आणि ७ फेब्रुवारी रोजी मतमोजणीसह निकाल जाहीर होईल, अशी माहिती डॉ. मगर यांनी दिली. प्रशिक्षणात सर्व नियुक्त अधिकार्यांनी मास्टर ट्रेनर यांच्या मार्गदर्शनाखाली मतदान प्रक्रिया, यंत्र सिल करण्याविषयी हॅन्डऑन प्रशिक्षण घेतले.
