ज्ञानेश्वरी महापारायण सांगता सोहळा
सेलू : शहरात संपन्न होत असलेल्या झालेल्या फिरता ज्ञानेश्वरी पारायण सांगता सोहळ्यानिमित्त सोमवारी सकाळी भव्य शोभायात्रा काढण्यात आली. केशवराज बाबासाहेब महाराज मंदिरापासून सकाळी ८ वाजता या शोभायात्रेला सुरुवात झाली. या सोहळ्यानिमित्त शहरात स्थानिक कलाकारांनी रेखाटलेल्या भाव भक्तिमय रांगोळींनी लक्ष वेधून घेतले.
शोभायात्रेचा मार्ग बाबासाहेब मंदिर, क्रांती चौक, छत्रपती शिवाजी महाराज पुतळा, बस स्थानक, नूतन कॉलेज, रायगड ते मयुरी पार्क असा सुमारे ३ किलोमीटरचा होता. या प्रमुख मार्गावरील चौकाचौकांमध्ये भव्य रांगोळी रेखाटण्यासाठी चित्रकला शिक्षक संतोष ताल्डे, पांडुरंग पाटणकर, रवी रोडगे, शितल देशमुख, रूपाली कान्हेकर, महादेव बोरकर तसेच कस्तुरबा गांधी विद्यालयातील विद्यार्थिनींनी उत्स्फूर्त सहभाग नोंदवला. कलाकारांनी आपल्या कौशल्याने साकारलेल्या या भव्य रांगोळ्यांमुळे संपूर्ण वातावरणात भक्तीचा रंग भरला आणि शोभायात्रेची शोभा द्विगुणित झाली.या रांगोळी केवळ आकाराने मोठ्या नव्हत्या, तर त्यात ज्ञानेश्वरीतील आध्यात्मिक आशय आणि वारकरी संप्रदायाचे सौंदर्य अतिशय सुबकपणे मांडण्यात आले होते. भक्ती आणि कलेचा संगम साधत रेखाटलेली विविध पारंपारिक नक्षीकाम, राम कृष्ण हरी, पताका व सुंदर अलंकारिक पानाफुलांच्या आकारांनी या रांगोळ्या नटलेल्या होत्या. सेवाभावाच्या उदात्त हेतूने रांगोळी काढत माऊलीची सेवा करण्याचे भाग्य लाभले, अशी भावना नितीन माध्यमिक विद्यालय आहेर बोरगाव येथील कलाशिक्षक संतोष ताल्डे यांनी व्यक्त केली.रांगोळी कलाकारांच्या या कलेचे कौतुक करण्यासाठी आणि त्यांना प्रोत्साहन देण्यासाठी नूतन महाविद्यालयाचे प्राचार्य शरद कुलकर्णी, माजी नगराध्यक्ष विनोद बोराडे, शरद ठाकर, माधव गव्हाणे यांची उपस्थिती होती. या कलाविष्कारामुळे सेलू नगरी भक्तीमय झाली होती.
