जिंतूर तालुक्यातील बोर्डी परिसरात आनंदाचे वातावरण
परभणी : जिंतूर तालुक्यातील बोर्डी गावचे जावई डॉ.सदानंद दाते यांची भारतीय शेअर बाजार नियामक संस्था अर्थात सेबीमध्ये कार्यकारी संचालक म्हणून नियुक्ती झाली आहे. या नियुक्तीमुळे परभणी जिल्ह्यात आणि बोर्डी परिसरात आनंदाचे वातावरण निर्माण झाले आहे. ते माजी आमदार रामप्रसाद बोर्डीकर यांचे जावई असून आमदार मेघना साकोरे बोर्डीकर यांच्या भगिनी नयना बोर्डीकर दाते यांचे पती आहेत.
डॉ सदानंद दाते यांनी ४ मार्च २०२६ रोजी मुंबई येथे सेबीमध्ये कार्यकारी संचालक पदाचा पदभार स्वीकारला. या पदावर काम करताना ते सेबीच्या तपास विभागाची मुख्य जबाबदारी सांभाळणार आहेत. सदानंद दाते हे २००७ बॅचचे भारतीय पोलीस सेवा (आयपीएस) अधिकारी असून ते उत्तराखंड कॅडरचे आहेत.सेबीमध्ये नियुक्ती होण्यापूर्वी ते केंद्रीय अन्वेषण विभाग म्हणजेच सीबीआयमध्ये केंद्रीय प्रतिनियुक्तीवर कार्यरत होते. सीबीआयमध्ये त्यांनी लाचलुचपत प्रतिबंधक विभाग तसेच बँक सुरक्षा आणि फसवणूक कक्षात पोलीस अधीक्षक म्हणून महत्त्वपूर्ण जबाबदाऱ्या यशस्वीपणे सांभाळल्या आहेत. तपास आणि प्रशासन क्षेत्रातील त्यांचा व्यापक अनुभव लक्षात घेता सेबीच्या तपास विभागाच्या कार्यक्षमतेत निश्चितच वाढ होईल, अशी अपेक्षा व्यक्त केली जात आहे. त्यांच्या या निवडीबद्दल बोर्डीकर परिवारासह परिसरातून त्यांच्यावर अभिनंदनाचा वर्षाव होत आहे.
