उमेश महाराज दशरथे यांच्या कीर्तनाने भाविक मंत्रमुग्ध; सोमवारी दीपोत्सव
सेलू : परभणी जिल्ह्यातील सेलू येथे आयोजित फिरता ज्ञानेश्वरी पारायण सोहळ्याची सांगता सोहळ्यात ह.भ.प. उमेश महाराज दशरथे यांचे सुश्राव्य कीर्तन संपन्न झाले. त्यांनी आपल्या निरूपणातून ईश्वराचे सर्वव्यापी रूप मांडत प्रत्येक कर्मात ईश्वर पाहण्याचा संदेश भाविकांना दिला. या सोहळ्यासाठी पंचक्रोशीतील भाविकांनी मोठी गर्दी केली होती.
सांगता सोहळ्याचे औचित्य साधून माधवराव काकडे आणि गोविंदजी डालिया यांच्या हस्ते संत पूजन करण्यात आले. एकादशी असल्याने पालखी तळावर विशेष हरिजागर आयोजित करण्यात आला असून सासवड येथील पालखीचे पुजारी प्रतीक महाराज देव यांच्या हस्ते मंत्रोपचारात माऊलींची महापूजा करण्यात आली. या सोहळ्यासाठी विविध गावांतील भाविकांनी फराळाचे पदार्थ पाठवून मोलाचे योगदान दिले.या कार्यक्रमास जोग महाराज वारकरी शिक्षण संस्थेचे माजी विद्यार्थी पांडुरंग महाराज आनंदे, योगेश महाराज रुणीकर, महादेव महाराज पुरे, ज्ञानेश्वर माऊली खेडेकर, रतानंद स्वामीजी त्र्यंबकेश्वर यांसह अनेक मान्यवर उपस्थित होते. सोहळ्याचा पुढील टप्पा म्हणून सोमवारी, १६ मार्च रोजी भव्य दीपोत्सव साजरा केला जाणार असून प्रसिद्ध कीर्तनकार पुरुषोत्तम महाराज पाटील आणि महादेव महाराज राऊत यांची कीर्तने होणार आहेत. या सोहळ्याच्या यशस्वीतेसाठी सेलू परिसरातील भाविक आणि स्वयंसेवक परिश्रम घेत आहेत.
