सात पिकअपसह एक आयशर जप्त; ५५ लाखांचा मुद्देमाल पोलिसांनी केला हस्तगत
सेलू : सेलू शहरातील रायगड कॉर्नर या ठिकाणी गुरुवारी, १६ एप्रिल रोजी पहाटे ५ वाजताच्या सुमारास अवैध गोवंश जनावरांची वाहतूक करणाऱ्या ७ पिकअप आणि १ आयशर अशा वाहनांवर पोलिसांनी मोठी कारवाई केली. या प्रकरणी वाहनांवरील चालकांविरोधात सेलू पोलीस ठाण्यात एकूण ३ गुन्हे दाखल करण्यात आले आहेत.
या कारवाईमध्ये एकूण ११ आरोपी असून ४५ बैल जातीची गोवंश जनावरे जप्त करण्यात आली आहेत.पारडगाव तालुका परतूर या ठिकाणाहून ही जनावरे वाहनांमध्ये निर्दयतेने कोंबून, त्यांना यातना होईल अशा पद्धतीने मोटर वाहन कायद्याचे उल्लंघन करून नेली जात होती. रायगड कॉर्नर येथे ही वाहने पकडल्यानंतर पोलिसांनी ५५ लाख रुपये किमतीचा मुद्देमाल जप्त केला. यात वाहने आणि जनावरांचा समावेश आहे. जप्त केलेली सर्व जनावरे इटोली ता. जिंतूर येथील गोशाळेत सुरक्षित पाठवण्यात आली आहेत. अशी माहिती पोलिस निरीक्षक दीपक बोरसे यांनी दिली. सदरची कार्यवाही पोलीस अधीक्षक दीपककुमार वाघमारे यांच्या मार्गदर्शनाखाली पोलीस उपनिरीक्षक राऊत, पोलीस हवालदार जाधव, तेलंगे, कोपनर, रासकटला आणि साठे यांनी केली आहे. या गुन्ह्याचा पुढील तपास पोलीस हवालदार तेलंगे, शेख आणि राठोड हे करीत आहेत.
