सर्वत्र सामसूम, ठिकठिकाणी दुचाकी फेऱ्या, जोरदार घोषणाबाजी
परभणी : मराठा आरक्षण संघर्षयोध्दा मनोज जरांगे पाटील यांनी जालना जिल्ह्यातील अंतरवाली सराटी येथे मराठा आरक्षणाच्या मागणीसाठी सुरू केलेल्या बेमुदत उपोषणाच्या समर्थनार्थ सकल मराठा समाज बांधवांनी गुरुवारी, ३ सप्टेंबर २०२६ रोजी पुकारलेल्या बंदला परभणी शहरासह जिल्ह्यात उत्स्फूर्त प्रतिसाद मिळाला. जिल्हाभरात कडकडीत बंद पाळण्यात आला.
जिल्ह्यातील सर्वच तालुका शहराच्या ठिकाणी तसेच मोठ्या बाजारपेठातील गावांमध्ये व्यापार्यांनी आवाहनाला प्रतिसाद देत आपापली प्रतिष्ठाने बंद ठेवली. विशेषत: शहरातील सर्वच मुख्य रस्त्यावरील दुकाने, व्यापार पेठा, मोंढा भागात सकाळपासून सामसूम दिसून आली. बुधवारी जिल्हा पोलिस अधिक्षक कुमावत यांची सकल मराठा समाजाच्या एका शिष्टमंडळाने भेट घेऊन परभणी जिल्हा बंद संदर्भात निवेदन सादर केले होते.
शहरासह जिल्ह्यात ठिकठिकाणी गुरुवारी सकाळी सकल मराठा समाजाच्या काही बांधवांनी मोटारसायकल रॅली काढून व्यापार्यांना व्यवहार बंदमध्ये सहभागी होण्याचे आवाहन केले. विविध घटकांकडून बंदला उत्स्फूर्त प्रतिसाद मिळाला. शहरासह जिल्ह्यातील शाळा, महाविद्यालये शैक्षणिक संस्थांना बंद पाळण्याचे आवाहन करण्यात आले होते. बंदमुळे दुपारी उशीरापर्यंत सर्वत्र शुकशुकाट होता.
मराठा आरक्षणाच्या प्रश्नावर सरकारने तातडीने ठोस निर्णय घ्यावा, तसेच जरांगे पाटील यांच्या मागण्या मान्य करून त्यांचे उपोषण तातडीने सोडविण्याची कार्यवाही करावी, अशी मागणी सकल मराठा समाज बांधवांनी निवेदनाद्वारे केली आहे. परभणी जिल्ह्यात बंदला मिळालेला प्रतिसाद हा मराठा समाजाच्या आरक्षणाच्या मागणीसाठी असलेल्या एकजुटीचे आणि आंदोलनाला मिळणार्या व्यापक पाठिंब्याचे द्योतक असल्याचे समन्वयकांनी सांगितले.
गुरुवारचे चाचणी पेपर शनिवारी
दरम्यान, जिल्हा बंदच्या पार्श्वभूमीवर परभणी जिल्हा शिक्षण संवर्धन मंडळाच्या वतीने जिल्हाभरातील सुमारे ३५० शाळांत गुरुवारी, ३ सप्टेंबर रोजी आयोजित इयत्ता पाचवी ते दहावीची प्रथम घटक चाचणीचे पेपर रद्द करण्यात आले. गुरुवारी, ३ सप्टेंबर रोजी होणाऱ्या विषयाचे पेपर शनिवारी, ५ सप्टेंबररोजी होतील. तसेच ४ सप्टेंबर आणि ७ सप्टेंबर रोजी होणाऱ्या विषयाचे पेपर निर्धारित वेळापत्रकानुसारच होतील. त्यात कोणताही बदल करण्यात आला नाही. याची विद्यार्थी, पालकांनी नोंद घ्यावी, असे संवर्धन मंडळांशी संलग्न शाळांनी कळविले आहे.
