पाथरीजवळील घटना, दोन गंभीर जखमी; सेलू शहर, डासाळा गावावर शोककळा
सेलू जि.परभणी : श्रावणी सोमवार निमित्त सेलू येथील संकल्प अखंड हिंदू राष्ट्र समितीच्यावतीने आयोजित सेलूहून पाथरी तालुक्यातील रत्नेश्वर रामपुरी येथे आलेल्या कावड यात्रेतील भाविक परतीच्या मार्गावर असताना पहाटे पाचच्या सुमारास कार थेट यात्रेत घुसली. या अपघातात दोन भाविक जागीच ठार झाले, तर चार जण जखमी झाले आहेत. ही घटना पाथरी-सेलू रस्त्यावरील खेडुळा पाटीवर सोमवारी, ११ ऑगस्ट रोजी पहाटे पाच वाजता घडली. दहावीत शिक्षण घेत असलेल्या ऋषिकेश सुरेशराव शिंदे (वय १६, रा. दत्तनगर, सेलू) आणि एकनाथ गंगाधरराव गजमल (वय ५० रा. डासाळा, ता. सेलू) अशी मृतांची नावे आहेत. तर दोन गंभीर व दोन किरकोळ जखमींना तातडीने रुग्णालयात हलविण्यात आले असून त्यांच्यावर सेलू येथे उपचार सुरू आहेत. श्रावण मासानिमित्त तीर्थक्षेत्र रामपुरी रत्नेश्वर येथील गोदावरीचे पाणी नेण्यासाठी सेलू तालुक्यातील भाविकांची कावड यात्रा रविवारी सायंकाळी सेलू येथील शिवतीर्थ परिसरातून रामपुरीकडे निघाली. रामपुरी येथील गोदावरी नदीतून गंगाजल घेऊन पहाटे तीन वाजता ही कावड यात्रा परत सेलूकडे निघाली होती. पाथरी – सेलू रस्त्यावर खेडुळा पाटीवर यात्रा आली असता, यात्रेसोबत असलेली झेस्ट कार एम एच ३ सीएच १२११ कारला आज्ञात वाहनाची धडक बसल्याने ती कार यात्रेत घुसून अपघात झाला. अपघाताची माहिती मिळताच पाथरी पोलिस ठाण्यातील सहायक पोलीस निरीक्षक सोमनाथ नरके , जैस्वाल, थोरे आणि इतर कर्मचाऱ्यांनी तातडीने घटनास्थळी धाव घेतली. घटनेची माहिती मिळताच पाथरी पोलीस ठाण्याचे सपोनि सोमनाथ नरके, सपोनि शिवसांभा स्वामी, विष्णू वाघ, परमेश्वर थोरे व सुरेश कदम यांनी धाव घेतली. मृतदेहांचे शवविच्छेदन पाथरी ग्रामीण रुग्णालयात करण्यात आले. दरम्यान, उपविभागीय पोलीस अधिकारी दीपककुमार वाघमारे आणि पोलीस निरीक्षक महेश लांडगे यांनी घटनास्थळी तसेच रुग्णालयाला भेट देऊन पाहणी केली. या संदर्भात पाथरी पोलीस ठाण्यात गुन्हा दाखल करण्याची प्रक्रिया सुरू असून पुढील तपास सुरू आहे. दरम्यान, सोमवारी सकाळी सेलू येथील रेल्वे गेटवर या कावड यात्रेचे स्वागत करण्यासाठी सेलू शहरात मोठ्या प्रमाणावर तयारी करण्यात आली होती. भव्य मिरवणुकीनंतर या यात्रेची सांगता शंकरलिंग मंदिरात महाभिषेक व महाआरतीने होणार होती. मात्र, कावड यात्रा सेलूत पोहचण्यापूर्वीच अपघातात दोन भाविकांचा मृत्यू झाल्याने संपूर्ण सेलू शहर, डासाळा गावावर शोककळा पसरली आहे.
