वाशिम (फुलचंद भगत) : राज्याचे कृषिमंत्री तथा वाशिम जिल्ह्याचे पालकमंत्री ना. दत्तात्रय भरणे यांनी कारंजा येथील स्व. प्रकाशदादा डाहाके निसर्ग पर्यटन केंद्र व गुरु मंदिरास भेट दिली. यावेळी त्यांनी निसर्गरम्य परिसर, जंगल सफारी तसेच पर्यटकांसाठी उपलब्ध सुविधांची पाहणी करून संबंधित अधिकाऱ्यांकडून माहिती घेतली.यावेळी आमदार सईताई डाहाके, माजी जिल्हा परिषद अध्यक्ष चंद्रकांत ठाकरे, उपवनसंरक्षक माधवराज, अपर जिल्हाधिकारी ब्रिजेश पाटील, उपविभागीय अधिकारी कैलास देवरे आदी उपस्थित होते.
निसर्ग पर्यटनाच्या माध्यमातून परिसराच्या विकासाला चालना देण्याच्या दृष्टीने उपलब्ध सुविधांची माहिती घेताना पालकमंत्र्यांनी वनसंपदेचे संवर्धन आणि पर्यटकांना अधिक चांगल्या सुविधा उपलब्ध करून देण्याबाबत संबंधित अधिकाऱ्यांशी चर्चा केली.यावेळी त्यांनी स्व. प्रकाशदादा डाहाके यांच्या आठवणींना उजाळा देत त्यांच्या कार्याचे स्मरण केले. निसर्ग पर्यटनाच्या क्षेत्रातील त्यांचे योगदान तसेच परिसराच्या विकासासाठी त्यांनी केलेल्या कार्याचा यावेळी उल्लेख केला.त्यानंतर ना. दत्तात्रय भरणे यांनी गुरु मंदिरास भेट देऊन भगवान श्री नृसिंह सरस्वतींचे दर्शन घेतले. मंदिर परिसराची पाहणी करून त्याचे धार्मिक व ऐतिहासिक महत्त्व याबाबतची माहितीही त्यांनी जाणून घेतली.
