विविध सांस्कृतिक कार्यक्रमांचे सादरीकरण
परभणी : धर्मापुरी येथील ज्ञानसाधना प्रतिष्ठान संचलित रायरेश्वर माध्यमिक व उच्च माध्यमिक विद्यालयात १५ ऑगस्ट २०२६ रोजी स्वातंत्र्यदिनानिमित्त ध्वजारोहण उत्साहात पार पडले. यानिमित्ताने इयत्ता पाचवी ते आठवीच्या विद्यार्थ्यांनी भाषणे, देशभक्तीपर गीते, देशभक्तीपर नृत्ये, मानवी मनोरे आणि संगीत कवायतींचे उत्कृष्ट सादरीकरण केले.
या प्रसंगी राष्ट्रपिता महात्मा गांधी व भारतीय राज्यघटनेचे शिल्पकार डॉ. बाबासाहेब आंबेडकर यांच्या प्रतिमेचे पूजन करून पुष्पहार अर्पण करण्यात आला. संस्थेचे अध्यक्ष प्रा. किरण सोनटक्के यांच्या हस्ते ध्वजारोहण पार पडले. त्यानंतर स्काऊट गाईड पथकातील विद्यार्थ्यांनी पथसंचलन करून तिरंग्याला मानवंदना दिली. तसेच ज्ञानसाधना सुरसागर गीत संचाने ध्वजगीताचे सामूहिक सादरीकरण केले.या वेळी संस्थेच्या सचिव प्रा. शितल सोनटक्के यांनी स्वातंत्र्यदिनाचे महत्त्व अधोरेखित करून विद्यार्थ्यांना मार्गदर्शन केले. संस्थेचे समन्वयक नवनाथ सोनटक्के, डोंबे तसेच विभागप्रमुख जोशी, पवार, नईम शेख आणि सौ.भुसारे यांनी विद्यार्थ्यांना स्वातंत्र्यदिनाच्या शुभेच्छा दिल्या. सूत्रसंचालन सौ. भुसारे यांनी केले, तर सामूहिक महाराष्ट्र गीताने कार्यक्रमाची सांगता झाली. या प्रसंगी माध्यमिक व उच्च माध्यमिक विभागाचे सर्व समन्वयक, विभागप्रमुख, शिक्षक व शिक्षकेतर कर्मचारी उपस्थित होते. कार्यक्रम यशस्वी करण्यासाठी सर्व शिक्षकांनी परिश्रम घेतले.
