गंगाखेड येथे न्यायमूर्ती संदीप कुमार सी.मोरे यांच्या हस्ते उद्घाटन, मान्यवरांची उपस्थिती
परभणी : मुंबई उच्च न्यायालय खंडपीठ छत्रपती संभाजीनगरचे न्यायमूर्ती संदिपकुमार सी. मोरे यांच्या हस्ते शनिवारी, १४ फेब्रुवारी रोजी शासकीय योजनांचा महामेळावा व कायदेविषयक महाशिबिर गंगाखेड येथे नागरिकांच्या उत्स्फूर्त प्रतिसादात पार पडले.
जिल्हा व सत्र न्यायाधीश तथा अध्यक्ष जिल्हा विधी सेवा प्राधिकरण उज्वला नंदेश्वर यांच्या अध्यक्षतेखाली पार पडलेल्या या कार्यक्रमास जिल्हाधिकारी संजयसिंह चव्हाण, जिल्हा परिषदेच्या मुख्य कार्यकारी अधिकारी नतीशा माथुर, न्यायाधीश-एक तथा गंगाखेड तालुका विधी सेवा समितीचे अध्यक्ष दिनेश डी. कुरुलकर यांची प्रमुख उपस्थिती होती.शासन हे सर्वस्तरावर जनतेच्या कल्याणासाठी विविध योजना राबवत असते. शासनाच्या अनेक योजना ऑनलाईन उपलब्ध आहेत. जनतेने विशेषतः तरुणांनी आधुनिक तंत्रज्ञानाचा वापर करून या योजनांचा लाभ घ्यावा, असे असे प्रतिपादन न्यायमूर्ती संदिपकुमार सी. मोरे यांनी केले. नागरिकांच्या मूलभूत गरजा पूर्ण व्हाव्यात आणि योजना थेट लाभार्थ्यांपर्यंत पोहोचाव्यात, यासाठी या महामेळाव्याचे आयोजन करण्यात आले तसेच, जनतेच्या कायदेविषयक अडचणी सोडविण्यासाठी विधी सेवा प्राधिकरण प्रभावीपणे कार्यरत असल्याचे त्यांनी सांगितले.राष्ट्रीय विधी सेवा प्राधिकरण, सर्वोच्च न्यायालय तसेच महाराष्ट्र राज्य विधी सेवा प्राधिकरण, उच्च न्यायालय, मुंबई यांच्या निर्देशानुसार जिल्हा विधी सेवा प्राधिकरण, परभणी, तालुका विधी सेवा समिती, गंगाखेड आणि जिल्हा प्रशासन यांच्या संयुक्त विद्यमाने या महामेळाव्याचे आयोजन करण्यात आले होते.जिल्हा विधी सेवा प्राधिकरण अध्यक्षा उज्वला नंदेश्वर यांनी प्रास्ताविकात भारतीय संविधानाने सर्वांना हक्क व अधिकार दिले असून सामाजिक-आर्थिक न्याय व उत्तम जीवनमान हा त्याचा मुख्य उद्देश आहे. वंचित घटकांपर्यंत शासकीय योजना एकाच छताखाली पोहोचाव्यात, हा या मेळाव्याचा उद्देश असल्याचे सांगितले.जिल्हाधिकारी संजयसिंह चव्हाण म्हणाले की, समाजातील वंचित घटक न्यायापासून दूर राहू नयेत यासाठी हा उपक्रम हाती घेण्यात आला आहे. कायदा हा भीतीचा विषय नसून नागरिकांचे संरक्षण करणारा आणि न्याय देणारा आहे, अशी सकारात्मक भावना समाजात निर्माण होणे आवश्यक आहे. न्यायालयाबाबतची भीती दूर व्हावी, तसेच शासनाच्या विविध सेवांचा लाभ नागरिकांना एकाच ठिकाणी मिळावा हा उद्देश आहे.कार्यक्रमास जिल्हा विधी सेवा प्राधिकरणाचे सचिव भूषण एम. काळे, परभणी जिल्हा वकील संघाचे अध्यक्ष एस.टी.अडकिने, गंगाखेड तालुका वकील संघाचे अध्यक्ष ॲड. मिलिंद बी. क्षीरसागर आदींसह नागरिकांची मोठ्या प्रमाणात उपस्थिती होती. प्रारंभी विविध योजनांचा प्रातिनिधीक स्वरूपात प्रत्येकी दोन लाभार्थींना मान्यवरांच्या हस्ते लाभाचे वितरण करण्यात आले. या शिबीरांमध्ये विविध शासकीय कार्यालयांचे ४० स्टॉल उभारण्यात आले होते. यावेळी मान्यवरांनी सर्व स्टॉलला भेट देवून पाहणी केली.
