दर्शनासाठी मध्यरात्रीपासूनच भाविकांची गर्दी
परभणी/हिंगोली : महाशिवरात्रीनिमित्त आठवे ज्योतिर्लिंग श्रीक्षेत्र औंढा नागनाथ (जि.हिंगोली) येथील प्रभू नागनाथांचा मंदिर परिसर महाशिवरात्री निमित्ताने भाविकांच्या गर्दीने गजबजून गेला. राज्यासह परराज्यातील हजारो भाविकांनी ‘बम बम भोले’, ‘श्री नागनाथ महाराज की जय’चा जयघोष करत दर्शन घेतले. परिसरातील अनेक भाविक अनवाणी मंदिरामध्ये दाखल झाले होते
जिल्हाधिकारी राहुल गुप्ता यांनी सपत्नीक प्रभू नागनाथास दुग्धाभिषेक करून शासकीय महापूजा केली. तसेच कळमनुरीचे आमदार संतोष बांगर यांनीही सपत्नीक पूजा अर्चा केली. महापूजेनंतर मध्यरात्री २ वाजता मंदिर भाविकांच्या दर्शनासाठी खुले करण्यात आले.मुख्य पुजारी तुळजादास भोपी, पद्माक्ष पाठक, जीवन ऋषी, बंडू पंडित, आबागुरू बल्लाळ, गौरव पुराणिक आणि कल्याण पुराणिक यांनी महापूजेचे पौरोहित्य केले. मंदिर प्रशासनाच्या वतीने भाविकांच्या सोयीसुविधेसाठी विशेष नियोजन करण्यात आले. देवस्थानचे अध्यक्ष तथा तहसीलदार हरीश गाडे, अधीक्षक वैजनाथ पवार, व्यवस्थापक सुरेंद्र डफळ, नायब तहसीलदार प्रवीण ऋषी, तलाठी गजानन गुंजकर, नितीश कुलकर्णी, कृष्णा पाटील, नागेश माने, बबन सोनुने, मुकेश पाडोळे, जगदीश दिंडे, सुरेखा शिंदे, नंदा चोडेकर, शोभा जोशी, देवा देशमुख आणि गणेश जगताप हे मंदिर परिसरात व्यवस्थापनासाठी उपस्थित होते. सुरक्षेसाठी पोलीस निरीक्षक जी.एस.राहिरे आणि सपोनी कैलास भगत यांच्या उपस्थितीत कडक बंदोबस्त तैनात होता. १०० सीसीटीव्ही कॅमेऱ्यांद्वारे गर्दीवर लक्ष ठेवले जात होते. भाविकांसाठी २५ क्विंटल साबुदाणा खिचडी प्रसाद वाटपाची व्यवस्था करण्यात आली. परभणीतील शिवालयांमध्ये शिवभक्तांनी गर्दी परभणी : महाशिवरात्रीनिमित्त परभणी जिल्ह्यातील ठिकठिकाणच्या शिवालयामध्ये विविध कार्यक्रमांचे आयोजन करण्यात आले होते. शिवभक्तांनी दर्शनासाठी गर्दी केली होती. परभणी शहरातील नांदखेडा रोडवरील प्रसिद्ध श्री पारदेश्वर महादेव मंदिर, सेलू येथील श्री शंकरलिंग मंदिर, श्री हरकेश्वर, श्री साईबाबा मंदिरातील श्री महेश्वर, हातनूरचे श्री नागनाथ भगवान, श्री वाल्मिकेश्वर वालूर तसेच निरवाडी, कुंडी, केदारवाकडी, ढेंगळी पिंपळगाव, गोदाकाठारील श्री रत्नेश्‍वर रामपुरी, मुदगलेश्‍वर महादेव मंदिर, मगर सावंगी संगमावरील महादेव मंदिर, धारासूर येथील श्री गुप्तेश्‍वर, श्रीक्षेत्र त्रिधारा येथील ओंकारेश्‍वर महादेव मंदिर आदी ठिकाणच्या मंदिरात भाविकांची गर्दी झाली होती.
