परभणीतील चार मंडळात अतिवृष्टी
परभणी : मागील तीन-चार दिवसांपासून परभणी जिल्ह्यातील विविध भागात सुरू असलेल्या मुसळधार पावसामुळे जनजीवन विस्कळित झाले आहे. सोमवारी सकाळपर्यंत परभणी ६५.५ मिमी, माखणी ६९.५ मिमी, बोरी : ९४.०० मिमी आणि दुधगाव ७५.०० मिमी या चार महसूल मंडळांमध्ये अतिवृष्टी झाली आहे. यामुळे लहान-मोठ्या नद्यांना पूर आला असून शेतीचे मोठ्या प्रमाणावर नुकसान झाले आहे. शेतकऱ्यांमध्ये चिंतेचे वातावरण आहे.
सोमवारी पहाटे परभणी शहर आणि परिसरात जोरदार पाऊस झाला. यामुळे शहरातील अनेक रस्ते जलमय झाले असून सखल भागातील वस्त्यांमध्ये आणि घरांमध्ये पाणी शिरले. यामुळे नागरिकांची मोठी गैरसोय झाली.
शेतांमध्येही पाणी साचल्याने खरीप पिके पाण्याखाली गेली आहेत. शेतजमीनीला तलावाचे स्वरूप आले आहे. शेतकऱ्यांचे मोठे आर्थिक नुकसान झाले आहे. प्रशासनाकडून या नुकसानीची पाहणी सुरू आहे. सोमवारी सकाळी दहाच्या सुमारासही विविध भागात पाऊस झाला. सायंकाळी ढगाळ वातावरण होते.
गंगाखेड तालुक्यातील माखणी महसूल मंडळातील डोंगरगाव, डोंगर जवळा, कोदरी, बडवणी, सिरसम आणि इतर गावांना सोमवारी पहाटे ४ ते ७ या वेळेत झालेल्या ढगफुटीसदृश्य पावसामुळे मोठा फटका बसला आहे. या गावांमध्ये महापूर आल्याने घरांचे आणि पिकांचे मोठे नुकसान झाले आहे. या नुकसानीची पाहणी करण्यासाठी उपविभागीय अधिकारी जीवराज डापकर यांनी तातडीने गावांना भेट दिली. त्यांनी नागरिकांना धीर दिला आणि प्रशासनाकडून योग्य ती मदत करण्याचे आश्वासन दिले.यावेळी तहसीलदार, तालुका कृषी अधिकारी आणि इतर अधिकारी-कर्मचारी तसेच स्थानिक शेतकरी उपस्थित होते.
