परभणी जिल्ह्यातील सात नगरपालिकांसाठी सरासरी ७२.५५ टक्के मतदान
परभणी : परभणी जिल्ह्यातील सातही नगर परिषद निवडणुकांसाठी २ डिसेंबर २०२५ रोजी झालेल्या मतदानाची टक्केवारी रात्री अकरा वाजता जाहीर करण्यात आली. जिल्हाधिकारी कार्यालय, परभणी येथील नगरपरिषद प्रशासन विभागाने दिलेल्या माहितीनुसार, जिल्ह्यात एकूण २ लाख ४८ हजार ५१७ मतदारांनी (पुरुष १ लाख २५ हजार २४९, महिला १ लाख २३ हजार २५६, आणि इतर १२) नोंदणी केली होती. त्यापैकी १ लाख ८० हजार ३०३ मतदारांनी (पुरुष ९३ हजार २३१, महिला ८७ हजार ०६४, आणि इतर ८) आपला मतदानाचा हक्क बजावला. जिल्ह्यात झालेल्या मतदानाची सरासरी ७२.५५ टक्के आहे.नगरपरिषदनिहाय मतदानाची आकडेवारी पाहिल्यास, पूर्णा नगर परिषदेत ७०.३४ टक्के, गंगाखेड येथे ७१.८४ टक्के, सेलू येथे ६७.७१ टक्के, पाथरी येथे ७७.३४ टक्के, मानवत येथे ७३.५९ टक्के, जिंतूर येथे ७२.५ टक्के आणि सोनपेठ येथे ७८.१ टक्के मतदान झाले. या आकडेवारीनुसार, सर्वाधिक मतदान सोनपेठ येथे ७८.१ टक्के नोंदवले गेले, तर सेलू येथे सर्वात कमी, ६७.७१ टक्के मतदान झाले. एकूण २७२ मतदान केंद्रांवर सकाळी ७.३० ते सायंकाळी ५.३० या वेळेत ही प्रक्रिया पार पडली.
