सेलू तालुक्यातील ५४ एकल पालक व अनाथ बालकांची दिवाळी गोड
सेलू : एचएआरसी संस्थेतर्फे सेलू तालुक्यातील ५४ एकल पालक व अनाथ बालकांची दिवाळी गोड करण्यात आली तसेच ७ अनाथ विद्यार्थिनींना नवीन ड्रेस वाटप करण्यात आले. मागील १५ वर्षांपासून एचआयव्ही बाधित, अनाथ, वंचित आणि एकल पालक बालकांची दिवाळी आनंदात साजरी व्हावी यासाठी होमिओपॅथिक अकॅडमी ऑफ रिसर्च अँड चॅरिटीज (एचएआरसी) या संस्थेतर्फे दिवाळी दान महोत्सव या सामाजिक उपक्रमाचे आयोजन करण्यात आले.
११ ऑक्टोबर रोजी सेलूतील कस्तुरबा गांधी बालिका विद्यालय हा कार्यक्रम झाला. या उपक्रमांतर्गत ५४ अनाथ व निराधार मुलांना दिवाळी किट व ७ एकल पालक मुलींना नवीन ड्रेसचे वाटप करण्यात आले. या कार्यक्रमास एचएआरसी संस्थेचे अध्यक्ष डॉ. पवन चांडक, रवी मंत्री, ऍड. चंद्रकांत राजुरे, सुनिता वेडे, शरद ठाकर, रामराव बोबडे, रामराव गायकवाड आणि लक्ष्मण गाडेकर उपस्थित होते. या उपक्रमासाठी तालुक्यातील विविध शाळांमधील मुलांची निवड करण्यात आली. आली. दिवाळी किटमध्ये साडी, फराळाचे प्रकार, मोती साबण, सुगंधी तेल, उटणे, टूथब्रश, कंगवा, ब्लॅंकेट, चिक्की, लाडू, शॅम्पू इत्यादी साहित्याचा समावेश होता. या उपक्रमाचे सूत्रसंचालन पांडुरंग पाटणकर यांनी केले तर आभार प्रदर्शन माधव गव्हाणे यांनी केले. कार्यक्रम यशस्वी करण्यासाठी वरद जाजू, लखन उगीले, राजेभाऊ गिते, राम रोडगे आणि कालिदास राऊत यांनी परिश्रम घेतले. या प्रसंगी शिक्षक, पालक व मान्यवर उपस्थित होते.
