जिल्हाधिकारी संजयसिंह चव्हाण यांचे विभागप्रमुखांना आदेश
परभणी : केंद्र शासनाच्या निर्देशानुसार परभणी जिल्ह्यात १९ ते २५ डिसेंबर २०२५ या कालावधीत सुशासन सप्ताह राबवण्यात येणार आहे. या सप्ताहाच्या पार्श्वभूमीवर जिल्हाधिकारी संजयसिंह चव्हाण यांनी गुरुवारी जिल्हाधिकारी कार्यालयात आढावा बैठक घेऊन सर्व विभागप्रमुखांना प्रलंबित तक्रारींचे तातडीने निराकरण करण्याचे निर्देश दिले आहेत. या बैठकीला निवासी उपजिल्हाधिकारी अनुराधा ढालकरी यांच्यासह सर्व विभागांचे प्रमुख उपस्थित होते.
या सप्ताहादरम्यान नागरिकांना विविध शासकीय सेवा प्रभावीपणे पुरवणे आणि तक्रारींचे निवारण करणे यावर भर दिला जाणार आहे. विशेषतः आपले सरकार, पीजी पोर्टल आणि सेवा हक्क हमी कायद्यांतर्गत प्राप्त झालेल्या प्रलंबित अर्जांचे प्राधान्याने निकाल लावले जातील. प्रशासकीय प्रक्रिया अधिक गतिमान करण्यासाठी आधुनिक तंत्रज्ञानाचा वापर करणे, विशेष शिबिरांचे आयोजन करणे आणि नाविन्यपूर्ण उपक्रम राबवण्याच्या सूचना जिल्हाधिकाऱ्यांनी दिल्या आहेत. विभागप्रमुखांनी या उपक्रमात दक्ष राहून सुशासन सप्ताहाचे काटेकोर नियोजन करावे, असेही त्यांनी यावेळी स्पष्ट केले.
