जिद्द आणि चिकाटीने मिळविली पदवी
सेलू : येथील प्रज्ञा पुष्पा सुनील मोरे हिने २०२६ मध्ये ग्रँट गव्हर्नमेंट मेडिकल कॉलेज आणि जे. जे. हॉस्पिटल मुंबई येथून एम.बी.बी.एस. हे वैद्यकीय शिक्षण पूर्ण केले आहे. या यशाबद्दल तिचा पदवी प्रदान सोहळा दि. २३ मार्च २०२६ रोजी श्री षण्मुखानंद चंद्रशेखरेंद्र सरस्वती ऑडिटोरियम सायन येथे उत्साहात पार पडला.
प्रज्ञाने एम.बी.बी.एस. ही वैद्यकीय पदवी यशस्वीरीत्या प्राप्त करून आपल्या कुटुंबासह परिसराचे नाव उज्ज्वल केले असून तिच्या या यशामुळे नातेवाईक आणि मित्रपरिवारात आनंदाचे वातावरण आहे. विशेष म्हणजे प्रज्ञा ही मोरे कुटुंबातील पहिली डॉक्टर ठरली आहे. शिक्षक आजी-आजोबा आणि आई-वडील यामुळे सुरवातीपासूनच तिला शैक्षणिक वातावरण लाभले.प्रज्ञाने लहानपणापासूनच शिक्षणात सातत्याने उत्कृष्ट कामगिरी केली होती.
तिचे कठोर परिश्रम, चिकाटी आणि ध्येयाप्रती असलेली निष्ठा यामुळे तिने वैद्यकीय क्षेत्रात आपले स्थान निर्माण केले आहे. तिच्या या यशाबद्दल शिक्षक, मार्गदर्शक तसेच कुटुंबियांनी तिचे विशेष कौतुक केले आहे. प्रज्ञा हिच्या पुढील वैद्यकीय सेवेमुळे समाजाला मोठा फायदा होईल, असा विश्वास व्यक्त केला जात असून ग्रामीण भागातील रुग्णांना उत्तम आरोग्यसेवा देण्याचा प्रज्ञाचा मानस आहे.
