बोरीच्या जैन वाचनालयाचा प्रेरणादायी उपक्रम
बोरी/प्रतिनिधी : उत्कृष्ट ग्रंथालय पुरस्कार प्राप्त जैन वाचनालयाने ज्ञानाची अखंड ज्योत प्रज्वलित ठेवत सामाजिक बांधिलकी जपली आहे, असे प्रतिपादन जिल्हा परिषद सदस्या दिपालीताई अजय चौधरी यांनी केले. ५ सप्टेंबर २०२६ शिक्षक दिनानिमित्त आयोजित कार्यक्रमात जिल्हा परिषद प्रशालेचे मुख्याध्यापक प्रवीण रांजवण यांना ‘आदर्श मुख्याध्यापक पुरस्कार’ देऊन सन्मानित करण्यात आले.
कार्यक्रमाच्या अध्यक्षस्थानी वाचनालयाच्या अध्यक्षा मीना जैन होत्या. मान्यवरांच्या हस्ते डॉ. सर्वपल्ली राधाकृष्णन यांच्या प्रतिमेचे पूजन झाले. आरसीन पठाण व प्रांजल सुगावकर यांनी स्वागतगीत सादर केले. ग्रंथपाल नेमिनाथ जैन यांनी प्रास्ताविकातून भूमिका विशद केली.याप्रसंगी सहाय्यक पोलीस निरीक्षक अभिजीत आडके, तिरुपती बँकेचे अध्यक्ष सतीश चौधरी व संतोष तायडे यांनी मनोगत व्यक्त केले. सत्काराला उत्तर देताना प्रवीण रांजवण यांनी सहकारी शिक्षक व कर्मचाऱ्यांच्या सहकार्यामुळेच हा गौरव शक्य झाल्याचे सांगितले. अध्यक्षा मीना जैन यांनी अध्यक्षीय समारोप केला. व्यासपीठावर पोलीस उपनिरीक्षक महादेव गायकवाड, माजी केंद्रप्रमुख मोहम्मद शफी, दीपक कनकुटे, ग्रामपंचायत सदस्या अश्विनीताई चौधरी, मुख्याध्यापक गोरे, रामा राठोड, दीपक राजुरकर आदींची उपस्थिती होती. सूत्रसंचालन शिरीष बोरोले यांनी केले तर उपाध्यक्ष पवन ओझा यांनी आभार मानले. कार्यक्रमास शिक्षक व विद्यार्थी मोठ्या संख्येने उपस्थित होते.
