राजमाता जिजाऊ आणि स्वामी विवेकानंद जयंतीनिमित्त उपक्रम
परभणी : धर्मापुरी येथील ज्ञानसाधना प्रतिष्ठानमध्ये आयोजित वार्षिक क्रीडा सप्ताहाच्या बक्षीस वितरण समारंभात यावर्षीचे सहा गुणवंत खेळाडूंना ज्ञानसाधना खेलरत्न पुरस्कार प्रदान करण्यात आले. संस्थेचे अध्यक्ष प्रा. किरण सोनटक्के यांच्या अध्यक्षतेखाली झालेल्या या सोहळ्याला परभणीच्या जिल्हा क्रीडा अधिकारी गीता साखरे, संत जनाबाई महाविद्यालय गंगाखेडचे उपप्राचार्य तथा क्रीडा संचालक प्रा. चंद्रकांत सातपुते, संस्थेच्या सचिव शीतल सोनटक्के, पंडित चव्हाण, सुरेखा चव्हाण, प्रकाश पंडित, शंकर शहाणे यांची यांच्यासह सर्व विभागप्रमुख उपस्थित होते.
या समारंभात पवन सांगळे, पूनम तिथे, सार्थक शिंदे, स्वाती राठोड, अभय शिंदे आणि विद्या पोळ या सहा गुणवंत खेळाडूंना ज्ञानसाधना खेलरत्न पुरस्काराने गौरविण्यात आले. या पुरस्कारांतर्गत वार्षिक १२,००० रुपयांची शिष्यवृत्ती दिली जाणार आहे. उपस्थित मान्यवरांनी आपल्या मार्गदर्शनातून क्रीडा क्षेत्रातील संधी आणि खेळाचे महत्त्व अधोरेखित केले. अध्यक्षीय भाषणात प्रा. किरण सोनटक्के यांनी भविष्यात आधुनिक क्रीडा सुविधांनी सुसज्ज संकुल उभारण्याचा संकल्प व्यक्त केला. विद्यार्थ्यांच्या सांस्कृतिक सादरीकरणाने सोहळ्यात रंगत आणली. प्रास्ताविकात सचिव शीतल सोनटक्के यांनी केले.सूत्रसंचालन पी. एस. खंदारे व अपेक्षा रोडगे यांनी केले आणि अर्जुन चव्हाण यांनी उपस्थितांचे आभार मानले.
