राज्यमंत्री मेघना बोर्डीकर-साकोरे यांचे आरोग्य विभागाला निर्देश
परभणी : महाराष्ट्रातील प्रत्येक जिल्ह्यात सुरू असलेल्या रजोनिवृत्ती (मेनोपॉज) क्लिनिकद्वारे महिलांना अखंडित आरोग्य सेवा आणि योग्य तपासणी मिळावी, असे निर्देश आरोग्य राज्यमंत्री मेघना बोर्डीकर-साकोरे यांनी दिले आहेत.
मुंबई येथे १८ फेब्रुवारी रोजी आयोजित आढावा बैठकीत त्या बोलत होत्या. या प्रसंगी आरोग्य संचालक नितीन अंबाडेकर व अन्य अधिकारी उपस्थित होते.
१४ जानेवारी २०२६ रोजी सुरू झालेल्या या उपक्रमाला राज्यभरातून मोठा प्रतिसाद मिळत आहे. सध्या राज्यातील ५८० केंद्रांवर दर बुधवारी ही सेवा उपलब्ध असून, १८ फेब्रुवारी २०२६ पर्यंत सुमारे ३१,२८८ महिलांनी याचा लाभ घेतला आहे. यापैकी ३०,०३४ महिलांवर यशस्वी उपचार करण्यात आले आहेत.
राज्यमंत्र्यांनी या क्लिनिकसाठी स्वतंत्र मनुष्यबळ, औषध पुरवठा आणि गोपनीयतेची काळजी घेण्याच्या सूचना दिल्या. तसेच तज्ज्ञ डॉक्टरांची मदत घेऊन या केंद्रांची संख्या वाढवण्यावर भर देण्यास सांगितले. महिलांच्या आरोग्याचे रेकॉर्ड स्वतंत्रपणे ठेवल्यास भविष्यातील उपचारांसाठी मदत होईल, असे त्यांनी स्पष्ट केले. या योजनेची अधिक जनजागृती करण्यासाठी जिल्हा माहिती अधिकाऱ्यांच्या मदतीने स्थानिक स्तरावर प्रचार करण्याचे आदेशही त्यांनी यावेळी दिले.
