संमेलन यशस्वी करण्याचा सेलूकरांचा निर्धार
सेलू जि.परभणी : सेलू येथील अक्षर प्रतिष्ठान आयोजित, मराठी भाषा विभाग, महाराष्ट्र सरकार आणि महाराष्ट्र राज्य साहित्य आणि संस्कृती मंडळ, मुंबई यांच्या अनुदानातून रविवारी, १६ नोव्हेंबर रोजी साहित्य अकादमी पुरस्कारप्राप्त साहित्यिक डॉ.आसाराम लोमटे यांच्या अध्यक्षतेखाली परभणी जिल्हास्तरीय पहिल्या अक्षर साहित्य संमेलनाचे आयोजन करण्यात आले आहे. या संमेलनाच्या बोधचिन्हाचे प्रकाशन शुक्रवारी, ३१ ऑक्टोबर रोजी मान्यवरांच्या हस्ते करण्यात आले. यावेळी संयोजन समितीचे अध्यक्ष प्राचार्य डॉ.विनायकराव कोठेकर होते, माजी नगराध्यक्ष हेमंतराव आडळकर, विनोद बोराडे, माजी जिप उपाध्यक्ष राजेंद्र लहाने, मिलिंद सावंत, रहिम खान पठाण, उद्योजक महेशराव खारकर, विजया कोठेकर, उद्योजक निलेश बिनायके, स्वागताध्यक्ष सर्जेराव लहाने यांची उपस्थिती होती.
बोधचिन्ह तयार केल्याबद्दल आहेर बोरगाव येथील नितीन माध्यमिक व उच्च माध्यमिक विद्यालयाचे कला शिक्षक संतोष ताल्डे यांचा मान्यवरांच्या हस्ते सत्कार करण्यात आला. उपस्थितांनी, जिल्हास्तरीय पहिले अक्षर साहित्य संमेलनास सर्वतोपरी सहकार्य करून संमेलन यशस्वी करण्याचा निर्धार व्यक्त केला. यावेळी चंद्रशेखर मुळावेकर, देवगिरी बँकेचे शाखा व्यवस्थापक विश्वास देव, हरिकिशन शर्मा यांची उपस्थिती होती. प्रास्ताविक संयोजन समितीचे सरचिटणीस प्राचार्य डॉ.शरद कुलकर्णी यांनी केले. सूत्रसंचालन अक्षर प्रतिष्ठान तथा संयोजन समिती सचिव सुरेश हिवाळे यांनी केले, तर आभार प्रदर्शन राम निकम यांनी केले. प्रतिष्ठानचे अध्यक्ष शरद ठाकर, गणेश माळवे, शिवाजी शिंदे, करूणा बागले, जयश्री सोन्नेकर, सुरेखा आगळे उपस्थित होते.
