जिल्हाधिकारी संजयसिंह चव्हाण यांचे गौरवोद्गार, अपर आयुक्तपदी पदोन्नतीबद्दल डॉ.काळे यांना निरोप
परभणी : अपर जिल्हाधिकारी डॉ. प्रताप काळे यांची पदोन्नतीने छत्रपती संभाजीनगर विभागीय आयुक्त कार्यालयात अपर आयुक्त (क्रमांक एक) या पदावर नुकतीच पदस्थापना झाली. त्यांच्या या पदोन्नतीनिमित्त जिल्हाधिकारी कार्यालयात शुक्रवारी, ३१ ऑक्टोबर २०२५ रोजी निरोप समारंभ सोहळा आयोजित करण्यात आला होता.या कार्यक्रमाचे अध्यक्ष जिल्हाधिकारी संजयसिंह चव्हाण बोलताना म्हणाले की, “डॉ. प्रताप काळे हे महसूल विभागातील ‘भिष्मपितामह’ आहेत. त्यांच्या लोकाभिमुख कार्यशैलीमुळे परभणीचे प्रशासन अधिक सक्षम झाले आहे.”
पोलीस अधीक्षक रवींद्रसिंह परदेशी यांनीही डॉ. काळे यांच्या कार्याचा गौरव करून त्यांना भावी वाटचालीसाठी शुभेच्छा दिल्या.
जनता आणि प्रशासन केंद्रबिंदू
डॉ. काळे यांनी त्यांच्या मनोगतात सांगितले की, परभणीतला माझा कार्यकाळ अतिशय आनंददायी होता. प्रशासन आणि जनता हे माझे केंद्रबिंदू राहिले. समाधान देणारे आणि लोकाभिमुख प्रशासन करणे हेच माझे ध्येय राहिले आणि आहे.
निवासी उपजिल्हाधिकारी अनुराधा ढालकरी यांनी सांगितले की, डॉ. काळे यांनी परभणीत अपर जिल्हाधिकारी म्हणून उल्लेखनीय कार्य केले. निवडणूक, ‘शासन आपल्या दारी’ उपक्रम, सौर पंप योजना, कोतवाल व पोलीस पाटील भरती, शंभर दिवस उपक्रम तसेच ई-केवायसी अभियानात त्यांनी मोलाची कामगिरी बजावली. यावेळी सर्व अधिकारी व कर्मचाऱ्यांच्यावतीने डॉ. काळे यांचा सत्कार करण्यात आला. कार्यक्रमाचे प्रास्ताविक नायब तहसीलदार राजकुमार राठोड यांनी केले. कार्यक्रमास मनपा आयुक्त नितीन नार्वेकर, श्रीमती ढालकरी, उपजिल्हाधिकारी, सर्व उपविभागीय अधिकारी तसेच महसूलसह विविध विभागांचे अधिकारी, कर्मचारी उपस्थित होते.
डॉ.काळे यांच्या पदोन्नतीबद्दल सेलूमध्ये आज अभिनंदन सोहळा
सेलू : परभणीचे अप्पर जिल्हाधिकारी डॉ. प्रताप विमल सुग्रीव काळे यांची अपर विभागीय आयुक्त म्हणून छत्रपती संभाजीनगर विभाग येथे नियुक्ती झाली आहे. या आनंदाच्या निमित्ताने त्यांच्या अभिनंदनाचा व शुभेच्छांचा सोहळा सेलू येथे आयोजित करण्यात आलेला आहे. हा सोहळा शनिवारी, एक नोव्हेंबर २०२५ रोजी सायंकाळी सात वाजता होणार आहे.हा सोहळा श्री साईबाबा मंदिर सभामंडप, महेश नगर, सेलू, जिल्हा परभणी येथे आयोजित करण्यात आला आहे. कार्यक्रमाला माजी आमदार रामप्रसादजी बोर्डीकर यांची प्रमुख उपस्थिती राहणार आहे. कार्यक्रमास उपस्थित राहावे, असे आवाहन आयोजक डॉ.ऋतुराज साडेगावकर आणि मुकुंद आष्टीकर यांनी केले आहे. यानिमित्ताने संगीत रजनीचे आयोजन करण्यात आले आहे. असे आयोजकांनी कळविले आहे.
