सरदार पटेल यांना अभिवादन, सेलू् पोलिस प्रशासनाचा पुढाकार
सेलू : राष्ट्रीय एकतेचे प्रतीक असलेल्या सरदार वल्लभभाई पटेल यांच्या जयंतीनिमित्त शुक्रवारी, ३१ ऑक्टोबर रोजी सेलू येथे ‘एकता दौड (रन फॉर युनिटी)’ आयोजित करण्यात आली होती. या कार्यक्रमाचे उद्दिष्ट लोहपुरुषांच्या एकता, अखंडता आणि राष्ट्रनिर्मितीच्या भावनेचे स्मरण करणे आणि तरुणांमध्ये देशभक्ती जागृत करणे हे होते.
उपविभागीय पोलीस अधिकारी कार्यालय व पोलीस ठाणे सेलू यांच्या वतीने सरदार वल्लभभाई पटेल यांच्या जयंतीनिमित्त रन फॉर युनिटी (एकता दौड) या कार्यक्रमाचे आयोजन करण्यात आले होते. यावेळी उपविभागीय पोलीस अधिकारी दीपक वाघमारे, पोलीस निरीक्षक दीपक बोरसे यांच्यासह शेकडो युवक, विद्यार्थी, सुरक्षा कर्मचारी, पोलीस पाटील संघटना आणि प्रतिष्ठित नागरिकांनी या कार्यक्रमात उत्साहाने भाग घेतला. सहभागींनी देशात एकता आणि बंधुत्वाचा संदेश देण्यासाठी धाव घेतली. कार्यक्रमादरम्यान देशभक्तीपर गीते आणि घोषणांनी वातावरण भारावून गेले. शुक्रवारी सकाळी साडेसहा वाजता शहरातील छत्रपती शिवाजी महाराज यांच्या पुतळ्यापासून एकता दौड सुरू झाली तर रायगड कॉर्नर चौकात समारोप करण्यात आला.
स्वतंत्र भारताच्या निर्मितीत सरदार पटेल यांचे योगदान देशाच्या एकता आणि अखंडतेचा पाया आहे. नवीन पिढीला त्यांच्या प्रेरणादायी विचारांशी जोडणे आहे. हा या कार्यक्रमाचा मुख्य उद्देश आहे, असे उपविभागीय पोलीस अधिकारी दीपक वाघमारे यावेळी म्हणाले.
