अखिल भारतीय गांधर्व महाविद्यालय मंडळ : प्राविण्यासह प्रथमश्रेणीत ३२ विद्यार्थी
परभणी : अखिल भारतीय गांधर्व महाविद्यालय मंडळ, मुंबई अंतर्गत आयोजित संगीत कलेच्या गायन व वादन विषयाच्या प्रारंभिक आणि प्रवेशिका प्रथम परीक्षांचे निकाल नुकतेच घोषित झाले आहेत. या परीक्षेत धर्मापुरी येथील ज्ञानसाधना प्रतिष्ठान संचलित रायरेश्वर माध्यमिक व उच्च माध्यमिक विद्यालयाच्या ५ वी ते ८ वी सेमी विभागातील विद्यार्थ्यांनी दैदिप्यमान यश संपादन केले आहे.
प्रारंभिक परीक्षेसाठी गायन व वादन प्रकारात एकूण २८ विद्यार्थ्यांनी सहभाग नोंदवला होता. त्यापैकी ५ विद्यार्थ्यांनी विशेष प्राविण्यासह तर १९ विद्यार्थ्यांनी प्रथम श्रेणी मिळवून यश संपादन केले. त्याचप्रमाणे, प्रवेशिका प्रथम परीक्षेसाठी ७ विद्यार्थ्यांनी प्रवेश घेतला होता, त्यामध्ये २ विद्यार्थ्यांनी विशेष प्राविण्य मिळवले असून ५ विद्यार्थी प्रथम श्रेणीत उत्तीर्ण झाले आहेत. शालेय अभ्यासासोबतच कला क्षेत्रातही विद्यार्थ्यांनी उमटवलेली ही मोहोर कौतुकास्पद ठरली आहे.विद्यार्थ्यांच्या या यशाबद्दल संस्थेचे अध्यक्ष प्राध्यापक किरण सोनटक्के, सचिव शितल सोनटक्के तसेच शिक्षक व कर्मचारी यांनी यशस्वी विद्यार्थी आणि संगीत शिक्षकांचे अभिनंदन केले आहे.
