सायंकाळी उशिरापर्यंत मतदान, वयोवृद्धांसह महिला, नागरिक, दिव्यांगाचा सहभाग
सेलू : सेलू नगरपालिकेसाठी नगराध्यक्षपदासह २६ नगरसेवक उमेदवार निवडीसाठी एकूण ५० मतदान केंद्रावर शांततेत मतदान झाले. एकूण ४४ हजार ९९३ मतदारांपैकी ३० हजार ४६३ एवढ्या मतदारांनी मतदानाचा हक्क बजावला. सरासरी ६७.७१ टक्के मतदान झाले. सेलूत पुरुष २२ हजार ५९६ तर महिला मतदार २२ हजार ३८८ असून या वेळी पुरुष १५ हजार ७५६ व १४ हजार ७०० महिला व इतर ७ असे एकूण ३० हजार ४६३ मतदारांनी मतदानाचा हक्क बजावला. वाढत्या थंडीमुळे सकाळ पासुनच काही मतदान केंद्र वगळता अन्य मतदान केंद्रावर तुरळक गर्दी पाहावयास मिळाली. दुपारी जिल्हाधिकारी संजयसिंह चव्हाण यांनी सेलू येथील मतदान केंद्रावर भेट देऊन आढावा घेतला. एकूण ५० मतदान केंद्र होती. ५० पथक नियुक्त करण्यात आले होते. निवडणूक निर्णय अधिकारी उदयसिंह भोसले, सहाय्यक निवडणूक निर्णय अधिकारी तहसिलदार डॉ.शिवाजी मगर, मुख्याधिकारी तुकाराम कदम, गटविकास अधिकारी उदय जाधव, उपमुख्याधिकारी बी. एस. चव्हाण, पोलिस निरीक्षक दीपक बोरसे आदींसह अधिकारी कर्मचारी मतदान प्रक्रियेवर लक्ष ठेवून होते.
