२३ व २४ फेब्रुवारी रोजी दोन पुष्पे; ज्ञानेश्वरी आणि संघ शताब्दी विषयांवर होणार व्याख्याने
सेलू : भारतीय शिक्षण प्रसारक संस्था अंबाजोगाई संचलित, स्वामी विवेकानंद शैक्षणिक संकुल आयोजित आणि देवगिरी नागरी सहकारी बँक छत्रपती संभाजीनगर प्रायोजित जनुभाऊ रानडे स्मृती व्याख्यानमालेचे २३ व २४ फेब्रुवारी २०२६ रोजी आयोजन करण्यात आले आहे.
शहरातील नूतन विद्यालयातील रा.ब.गिल्डा सभागृहात सायंकाळी ६ वाजता ही व्याख्याने पार पडतील. व्याख्यानमालेचे हे १४ वे वर्ष आहे.व्याख्यानमालेचे पहिले पुष्प २३ फेब्रुवारी, सोमवार रोजी गुंफले जाईल. यावेळी ‘समग्र ज्ञानेश्वर माऊली’ या विषयावर निवृत्त जिल्हाधिकारी तथा ज्ञानेश्वरी अभ्यासक विजयकुमार फड यांचे व्याख्यान होणार आहे. या कार्यक्रमाच्या अध्यक्षस्थानी भारतीय शिक्षण प्रसारक संस्थेचे कार्यवाह हेमंत वैद्य उपस्थित राहतील.दुसऱ्या दिवशी २४ फेब्रुवारी, मंगळवार रोजी ‘संघ शताब्दी-कार्य आणि जबाबदारी’ या विषयावर शरदराव हेबाळकर यांचे व्याख्यान आयोजित करण्यात आले आहे. हेबाळकर हे भारतीय शिक्षण प्रसारक संस्थेचे माजी कार्यवाह असून अंबाजोगाई येथील खोलेश्वर महाविद्यालयाचे माजी इतिहास विभागप्रमुख आहेत. या सत्राच्या अध्यक्षस्थानी देवगिरी नागरी सहकारी बँकेचे अध्यक्ष किशोर शितोळे उपस्थित राहणार आहेत.या दोन दिवसीय व्याख्यानमालेस नागरिकांनी मोठ्या संख्येने उपस्थित राहावे, असे आवाहन जनुभाऊ रानडे स्मृती व्याख्यानमाला संयोजन समितीच्या वतीने करण्यात आले आहे.
