निवडणूक निर्णय अधिकारी शोभादेवी जाधव आणि डॉ.शिवाजी मगर यांनी केले मार्गदर्शन
परभणी : जिल्हा परिषद व पंचायत समिती निवडणूक २०२६ साठी प्रशासकीय यंत्रणा सज्ज असून, सर्व नियुक्त कर्मचारी व अधिकाऱ्यांनी निवडणूक प्रक्रियेतील नेमून दिलेले कर्तव्य जबाबदारीने पार पाडावे, असे आदेश निवडणूक निर्णय अधिकारी शोभादेवी जाधव यांनी दिले आहेत.
निवडणूक कार्यक्रमातील बदलानुसार आता येत्या ७ फेब्रुवारी २०२६ रोजी सकाळी ७.३० ते सायंकाळी ५.३० या वेळेत मतदान आणि ९ फेब्रुवारी रोजी मतमोजणी आणि निकाल जाहीर होणार असल्याचेही त्यांनी सांगितले.
शुक्रवारी, ३० जानेवारी रोजी सेलू येथील श्री साई नाट्यगृहात मतदान अधिकारी आणि कर्मचाऱ्यांचे दुसरे प्रशिक्षण दोन सत्रात झाले. प्रारंभी दिवंगत उपमुख्यमंत्री अजित पवार यांना भावपूर्ण आदरांजली वाहण्यात आली. हुतात्मा दिनानिमित्त हुतात्म्यांना आदरांजली तसेच राष्ट्रपिता महात्मा गांधी यांच्या स्मृतिस अभिवादन करण्यात आले. राज्य निवडणूक आयोग आणि जिल्हाधिकारी संजयसिंह चव्हाण यांच्या मार्गदर्शनाखाली ही प्रक्रिया राबविली जात आहे. यावेळी सहायक निवडणूक निर्णय अधिकारी तथा तहसीलदार डॉ.शिवाजी मगर, नायब तहसीलदार (निवडणूक) जयश्री कोल्हे, विजय मोरे यांची प्रमुख उपस्थिती होती. डॉ.मगर यांनी मतदान प्रक्रिया, केंद्राध्यक्ष व अधिकारी यांच्या कर्तव्यांविषयी सविस्तर माहिती दिली. विकास मुपडे यांनी सिलिंग प्रक्रियेविषयी माहिती दिली. सूत्रसंचालन सुभाष मोहकरे यांनी केले.
प्रशिक्षणासाठी सहायक महसूल अधिकारी हरिष टाक, अशोक राऊत, प्रताप शेरे, शेख नूर, विजय सोंजे, विकास मुपडे यांनी परिश्रम घेतले. एकूण ६६६ पैकी ६४० कर्मचारी उपस्थित होते, तर २६ कर्मचारी अनुपस्थित होते. अशी माहिती डॉ.मगर यांनी दिली. नियुक्त अधिकार्यांनी मास्टर ट्रेनर यांच्या मार्गदर्शनाखाली मतदान प्रक्रिया, यंत्र सिलिंग याविषयी प्रशिक्षण घेतले.
