परभणी : “छत्रपती शिवाजी महाराज महाराजस्व समाधान शिबिर (टप्पा-१)” अंतर्गत परभणी तालुक्यातील ग्रामीण मंडळातील मौजे ब्राह्मणगाव येथे शनिवारी, ७ मार्च रोजी समाधान शिबिर संपन्न झाले.
या शिबिरामध्ये महसूल विभागासह महिला व बाल विकास विभाग, पंचायत समिती, कृषी विभाग, पशुसंवर्धन विभाग, दुय्यम निबंधक कार्यालय, भूमी अभिलेख विभाग, आरोग्य विभाग आदी विविध विभागांनी सहभागी होऊन नागरिकांना विविध शासकीय सेवा व योजनांचा लाभ एकाच ठिकाणी उपलब्ध करून दिला. ग्रामीण भागातील नागरिक, शेतकरी, विद्यार्थी व महिलांनी यावेळी मोठ्या संख्येने उपस्थित राहून विविध शासकीय सेवांचा लाभ घेतला.शिबिर उद्घाटन कार्यक्रमाच्या अध्यक्षस्थानी ब्राह्मणगावच्या सरपंच गीता काळदाते या होत्या. तर प्रमुख पाहुणे म्हणून उपविभागीय अधिकारी उदयसिंह भोसले उपस्थित होते. कार्यक्रमास तहसीलदार डॉ. संदीप राजपुरे, पंचायत समिती सदस्य दिलीप काळदाते, जिल्हा भूमी अधीक्षक श्री. चौधरी गटविकास अधिकारी रावसाहेब चकोर, तालुका कृषी अधिकारी विजय नांदे, उपाधीक्षक, भूमी अभिलेख सुनील मोरे, तालुका आरोग्य अधिकारी डॉ. सोनवणे, दुय्यम निबंधक भास्कर घुगे, नायब तहसीलदारडॉ. राजकुमार राठोड उपस्थित होते. याशिवाय तालुक्यातील विविध विभागांचे अधिकारी व कर्मचारी मोठ्या संख्येने उपस्थित होते.शिबिरामध्ये महसूल विभागामार्फत ३१ फेरफार प्रकरणे निकाली काढण्यात आली, ७/१२ दुरुस्ती संदर्भात १० अर्ज स्वीकारण्यात आले, ६५ डिजिटल ७/१२ उतारे वितरित करण्यात आले, ६५ आठ-अ उतारे उपलब्ध करून देण्यात आले, १८८ विविध प्रमाणपत्रांचे वितरण करण्यात आले,तसेच २७ अर्ज सिंगल विंडो प्रणालीद्वारे निकाली काढण्यात आले. याशिवाय विविध विभागांमार्फत एकूण ६४७ लाभार्थ्यांना विविध योजनांचा लाभ देण्यात आला, तसेच लेक लाडकी, लाडकी बहीण व बाल संगोपन योजना यांसारख्या योजनांची माहिती नागरिकांना देण्यात आली. पुरवठा विभाग व संजय गांधी निराधार योजनेमार्फत ५५ लाभार्थ्यांना लाभ वितरित करण्यात आला. या समाधान शिबिरामुळे नागरिकांना विविध शासकीय सेवा व योजनांचा लाभ सुलभ, पारदर्शक व तत्काळ पद्धतीने मिळाल्यामुळे ग्रामस्थांनी समाधान व्यक्त केले.सदर शिबिरामध्ये नागरिकांना खालील विविध सेवा उपलब्ध करून देण्यात आल्या — प्रलंबित फेरफार प्रकरणे निकाली काढणे, ७/१२ मधील चुका दुरुस्ती, डिजिटल स्वाक्षरीत ७/१२ व ८अ वाटप, उत्पन्न, रहिवासी व जात प्रमाणपत्र, नॉन-क्रीमिलेयर प्रमाणपत्र, अकृषिक (NA) बाबत मार्गदर्शन, सनद प्रकरणांची माहिती, तुकडेबंदी कायद्याशी संबंधित प्रकरणांचा निपटारा, घरासाठी नवीन पट्टा व ई-मोजणी अर्ज, अंगणवाडी व पीएम किसान नोंदणी, शिधापत्रिका वाटप, सामाजिक अर्थसहाय्य योजनांचा लाभ तसेच विद्यार्थ्यांसाठी विविध दाखल्यांचे वाटप करण्यात आले.
