गटविकास अधिकारी उदय जाधव यांची माहिती : युपीएससी, एमपीएससी पूर्वपरीक्षा उत्तीर्ण विद्यार्थ्यांना मिळणार बळ
सेलू : पालकमंत्री मेघना साकोरे-बोर्डीकर यांच्या मार्गदर्शनाखाली सेलू पंचायत समितीच्या वतीने तालुक्यातील दिव्यांग बांधवांसाठी एक महत्त्वाचा निर्णय घेण्यात आला आहे. सन २०२४-२५ या वर्षात केंद्रीय लोकसेवा आयोग (यूपीएससी) आणि महाराष्ट्र राज्य लोकसेवा आयोग (एमपीएससी) च्या पूर्व परीक्षा उत्तीर्ण झालेल्या दिव्यांगांना अर्थसहाय्य आणि प्रोत्साहनपर अनुदान देण्यात येणार आहे.
पंचायत समितीच्या या पुढाकारामुळे परीक्षांची तयारी करताना येत असलेल्या अडचणींची सोडवणूक थोड्या प्रमाणात कमी होण्यास मदत होणार आहे.गटविकास अधिकारी उदय जाधव यांनी दिलेल्या माहितीनुसार, यूपीएससी आणि एमपीएससी परीक्षेची तयारी करत असलेल्या आणि पूर्व परीक्षा उत्तीर्ण झालेल्या, तसेच ४० टक्के किंवा त्याहून अधिक दिव्यांगत्व असलेल्या विद्यार्थ्यांना या अनुदानासाठी पात्र ठरविण्यात आले आहे.
अनुदानाचे स्वरूप :
* एकूण १० विद्यार्थ्यांना प्रत्येकी १० हजार रुपये अर्थसहाय्य व प्रोत्साहनपर अनुदान रक्कम देण्यात येणार आहे.
* जर यूपीएससी आणि एमपीएससी पूर्व परीक्षेचे पात्र विद्यार्थी मिळाले नाहीत, तर सन २०२४-२५ या वर्षातील १२ वी उत्तीर्ण विद्यार्थ्यांना प्रत्येकी ५ हजार रुपये अर्थसहाय्य व प्रोत्साहनपर अनुदान दिले जाईल.
अर्जाची प्रक्रिया: * जर १० पेक्षा जास्त पात्र विद्यार्थ्यांचे अर्ज आले, तर गुणवत्तेनुसार विद्यार्थ्यांची निवड करण्यात येणार आहे.
* अर्ज दाखल करण्याची अंतिम मुदत ३१ डिसेंबर २०२५ ही आहे.
* या योजनेचा लाभ घेण्यासाठी पात्र विद्यार्थ्यांनी पंचायत समिती कार्यालयाशी संपर्क साधावा, असे आवाहन गटविकास अधिकारी उदय जाधव यांनी केले आहे.सदर योजनेमुळे ग्रामीण भागातील दिव्यांग विद्यार्थ्यांच्या शिक्षणासाठी थोडी आर्थिक मदत होऊन त्यांना प्रोत्साहन मिळेल.
