सहाय्यक पोलिस निरीक्षक राऊत यांच्या पथकाने दुकानांची झडती घेतली; नायलॉन मांजा वापरू नका – पोलिसांचे जनतेला आवाहन
सेलू, दि. १३ : जीवघेण्या नायलॉन मांजाची विक्री आणि वापर रोखण्यासाठी आज सेलू शहरात पोलीस प्रशासनाने धडक मोहीम राबवली. सहाय्यक पोलिस निरीक्षक बलभीम राऊत यांच्या नेतृत्वाखालील पथकाने शहरातील पतंग आणि मांजा विक्रीच्या दुकानांची अचानक तपासणी करून झडती घेतली. सेलू पोलिस ठाण्याचे निरीक्षक दीपक बोरसे यांनी ही माहिती दिली. या पथकात हेड कॉन्स्टेबल तेलंग आणि पोलीस अंमलदार पुलाटे यांचा समावेश होता. शहरात नायलॉन मांजाची अवैध विक्री होत असल्याच्या माहितीवरून ही कारवाई करण्यात आली. सहाय्यक पोलिस निरीक्षक राऊत यांनी स्पष्ट केले की, नायलॉन मांजाची विक्री आणि साठा करणे कायद्याने गुन्हा आहे. यापुढेही शहरात आणि परिसरात अशी तपासणी मोहीम सातत्याने सुरू राहील आणि दोषींवर कठोर कायदेशीर कारवाई केली जाईल. जनतेने या जनहिताच्या मोहिमेत पोलिसांना सहकार्य करून नायलॉन मांजाचा वापर थांबवण्यासाठी जागरूक राहावे.
पोलिसांचे जनतेला आवाहन :
नायलॉन मांजा अत्यंत धोकादायक असून, त्यामुळे नागरिक, लहान मुले, पक्षी आणि दुचाकीस्वारांना गंभीर दुखापती होतात, तसेच अनेक जीवघेण्या दुर्घटना घडतात. या धोक्याची दखल घेऊन पोलिसांनी सेलू शहरवासियांना आणि विशेषतः तरुणांना आवाहन केले आहे की:
- नायलॉन मांजाचा वापर पूर्णपणे टाळावा.
- नायलॉन मांजाची विक्री किंवा साठा होत असल्यास तातडीने पोलिसांना माहिती द्यावी.
- आपल्या परिसरातील इतरांनाही या मांजराचे धोके समजावून सांगावे.
