नायब तहसीलदार जयश्री कोल्हे यांची माहिती
सेलू : राज्य निवडणूक आयोगाने १३ जानेवारी रोजी जिल्हा परिषद व पंचायत समितीच्या सार्वत्रिक निवडणुकीचा कार्यक्रम जाहीर केला असून, त्या अनुषंगाने जिल्हयात आदर्श आचारसंहिता लागू करण्यात आली आहे. परभणी जिल्ह्यात ५४ जिल्हा परिषद गट तर १०८ पंचायत समिती गणांसाठी ५ फेब्रुवारी २०२६ रोजी निवडणूक होणार आहे. यामध्ये सेलू तालुक्यातील ५ जिल्हा परिषद आणि १० पंचायत समितीच्या जागांसाठी निवडणूक होत आहे. विभागीय आयुक्त जितेंद्र पापळकर यांच्या आदेशानुसार निवडणूक निर्णय अधिकारी म्हणून उपविभागीय अधिकारी (रोहयो, परभणी) शोभादेवी जाधव, तर सहायक निवडणूक अधिकारी म्हणून तहसीलदार डॉ. शिवाजी मगर यांच्याकडे जबाबदारी आहे. निवडणुकीसाठी जिल्हा प्रशासनाच्या मार्गदर्शनात प्रशासन व यंत्रणा सज्ज झाली आहे.
सेलू तहसील कार्यालयात गुरुवारी, १५ जानेवारी रोजी आयोजित पत्रकार परिषदेत नायब तहसीलदार (निवडणूक) जयश्री कोल्हे यांनी ही माहिती दिली. सेलू तालुक्यात मतदानासाठी १३० केंद्रे निश्चित करण्यात आली आहेत. एकूण १ लाख २ हजार ३६४ मतदार या प्रक्रियेत सहभागी होतील. यामध्ये ५२ हजार ५२० पुरुष, ४९ हजार ८३४ महिला आणि अन्य एका मतदाराचा समावेश आहे.
१ जुलै २०२५ रोजीची मतदार यादी यासाठी ग्राह्य धरली जाणार आहे. मतदान केंद्रांवर दिव्यांग व ज्येष्ठ मतदारांसाठी रॅम्पची व्यवस्था केली जाईल. स्वीप कार्यक्रमांतर्गत जनजागृतीवर भर दिला जाणार आहे. निवडणुकीसाठी आवश्यक मतदान यंत्रे उपलब्ध असून कायदा व सुव्यवस्था राखण्यासाठी प्रतिबंधात्मक कार्यवाही करण्यात आली आहे. उमेदवारांसाठी खर्चाची मर्यादाही निश्चित करण्यात आली आहे. जिल्हा परिषदेसाठी उमेदवाराला ६ लाख रुपये, तर पंचायत समिती गणासाठी ४ लाख ५० हजार रुपये खर्च मर्यादा असेल, अशी माहिती कोल्हे यांनी दिली. निवडणूक विभागातील सहायक महसूल अधिकारी नारायण पिंपळे, गोविंद राठोड, अमोल खेडकर, विजय टेकाळे आदींची उपस्थिती होती.
निवडणुकीचा सविस्तर कार्यक्रम :
* निवडणूक सूचनेची प्रसिद्धी : १६ जानेवारी २०२६
* नामनिर्देशनपत्र (अर्ज) स्वीकारणे : १६ जानेवारी ते २१ जानेवारी २०२६
* नामनिर्देशनपत्रांची छाननी : २२ जानेवारी २०२६
* उमेदवारी अर्ज मागे घेण्याची मुदत: २७ जानेवारी २०२६
* चिन्ह वाटप आणि अंतिम उमेदवार यादी प्रसिद्धी : २७ जानेवारी २०२६
* मतदानाचा दिनांक : ५ फेब्रुवारी २०२६
* मतमोजणी : ७ फेब्रुवारी २०२६
