शिक्षक आमदार ज.मो.अभ्यंकर यांच्या पाठपुराव्याला यश
परभणी : जून महिन्यात ज्या शिक्षकांनी वरिष्ठ वेतन श्रेणी व निवड वेतन श्रेणीचे प्रशिक्षण पूर्ण केले, त्यांना या आठवड्यात प्रमाणपत्रे वितरित करण्यात आली आहेत. मात्र, प्रशिक्षण चालू असताना एक तास किंवा एक दिवस अनुपस्थित राहिल्यामुळे अनेक शिक्षकांचे वरिष्ठ व निवड वेतन श्रेणीचे प्रशिक्षण अपूर्ण राहिले होते. अशा शिक्षकांचे प्रशिक्षण दिवाळीनंतर लगेचच आयोजित करण्यात येणार आहे.या संदर्भात आमदार ज.मो.अभ्यंकर यांच्या पाठपुराव्याला यश आल्याचे शिक्षकसेनेचे मराठवाडा विभागीय कार्याध्यक्ष बाळासाहेब राखे यांनी मंगळवारी, ३० सप्टेंबर रोजी म्हटले आहे.एक ते चार दिवस प्रशिक्षणात उपस्थित राहून केवळ एखाद्या तासिकेला दहा पंधरा मिनिटेही उशीर झालेल्या शिक्षकांची ऑनलाईन अनुपस्थिती नोंदवली गेली. आणि त्यांना प्रशिक्षणातून बाद करण्यात आले होते. याबाबत महाराष्ट्र राज्य शिक्षक सेनेचे अध्यक्ष आमदार ज.मो.अभ्यंकर यांच्याकडे अशा अनेक शिक्षकांनी तक्रारी केल्या होत्या. त्यानुसार, आमदार अभ्यंकर यांनी एससीईआरटीचे संचालक राहुल रेखावार यांच्याशी संपर्क साधून चर्चा केली आणि शिक्षक सेनेतर्फे त्यांना पत्रही दिले होते. तसेच, अनेक जिल्ह्यांमधून यासंदर्भात आंदोलने देखील करण्यात आली होती. यासोबतच, शालेय शिक्षण मंत्री दादाजी भुसे आणि शिक्षण विभाग प्रधान सचिव रणजितसिंह देओल यांच्यासोबत मंत्रालयात बैठक घेऊन या विषयावर चर्चाही करण्यात आली होती.मंगळवारी, ३० सप्टेंबर २०२५ रोजी आमदार अभ्यंकर यांनी एससीईआरटीचे संचालक राहुल रेखावार यांच्याशी पुन्हा संपर्क साधून ज्या शिक्षकांचे प्रशिक्षण हुकले आहे, त्यांच्याविषयी विचारणा केली. त्यावर श्री. रेखावार यांनी सांगितले की, दिवाळीनंतर लगेचच अशा शिक्षकांसाठी प्रशिक्षणाचे आयोजन करण्यात येईल आणि २ ते ३ नोव्हेंबरपर्यंत ही प्रक्रिया पूर्ण झाली असेल.
