भजनी मंडळांच्या संतवाणी, अभंग आणि धार्मिक भजनांनी रंगले वातावरण
फुलचंद भगत/वाशिम :- पवित्र श्रावण सोमवार व एकादशीनिमित्त कृषी उत्पन्न बाजार समिती, मंगरूळपीर तसेच परिसरातील विविध ठिकाणी आयोजित धार्मिक व भजन कार्यक्रमांना भेटी देऊन उत्स्फूर्त सहभाग दर्शविण्यात आला. श्रावण सोमवारच्या पवित्र पार्श्वभूमीवर आयोजित या भक्तिमय कार्यक्रमांमुळे परिसरात श्रद्धा, भक्ती आणि हरिनामाचा मंगलमय गजर अनुभवायला मिळाला.
या निमित्ताने मुंगसाजी महाराज महिला भजनी मंडळ, कोळंबी, नाथ महाराज भजनी मंडळ, मंगरूळपीर, विठ्ठल-रुक्मिणी भजनी मंडळ, मंगरूळपीर तसेच गजानन महाराज भजनी मंडळ, लाठी आदी अनेक भजनी मंडळांच्या कार्यक्रमांना भेट देण्यात आली.या भक्तिमय कार्यक्रमांमध्ये सहभागी होत विविध भक्तिपर भजने, अभंग व संतवाणीचे गायन करण्यात आले.
हरिनामाच्या अखंड गजराने परिसर दुमदुमून गेला, तर उपस्थित भाविकांनी भक्तिरसाचा मनमुराद आनंद घेतला. संतांच्या विचारांचा जागर करीत भजन-कीर्तनाच्या माध्यमातून अध्यात्म, संस्कार आणि सामाजिक एकतेचा संदेश देण्यात आला.या प्रसंगी वाशिम जिल्हा भजनी मंडळाचे जिल्हाध्यक्ष सुधाकर शंकरराव भांडेकर यांनी विविध भजनी मंडळांना भेट देऊन कार्यक्रमांमध्ये सक्रिय सहभाग नोंदविला. विविध मंडळांतील सदस्यांशी आपुलकीने संवाद साधत त्यांनी संतपरंपरा, धार्मिक संस्कार आणि भजन संस्कृती जपण्याचे महत्त्व अधोरेखित केले.यावेळी त्यांच्यासोबत राजेश भाऊ बारड, भाऊराव सुर्वे, महेंद्र सावके, विठ्ठल सुर्वे व रामेश्वर सावके उपस्थित होते. विविध भजनी मंडळांच्या सदस्यांनीही उत्साहाने सहभाग नोंदवून भजन-कीर्तनाच्या माध्यमातून आपला भक्तिभाव व्यक्त केला.विशेष म्हणजे, मुंगसाजी महाराज महिला भजनी मंडळाच्या वतीने सुधाकर शंकरराव भांडेकर तसेच उपस्थित मान्यवरांचा सन्मानपूर्वक सत्कार करण्यात आला. या सत्कारामुळे कार्यक्रमातील वातावरण अधिक उत्साहपूर्ण व मंगलमय झाले.श्रावण सोमवार आणि एकादशीच्या पवित्र पार्श्वभूमीवर विविध भजनी मंडळांना दिलेल्या भेटी व धार्मिक भजनातील उत्स्फूर्त सहभागामुळे परिसरात श्रद्धा, भक्ती, संतवाणी आणि विठ्ठलनामाचा सुंदर संगम पाहायला मिळाला. अभंगांच्या सुरेल मैफली आणि हरिनामाच्या गजराने हा धार्मिक सोहळा अधिकच भक्तिमय वातावरणात साजरा झाला.
