फुलचंद भगत
वाशिम : श्री अमरनाथ भक्त मंडळ, शेलूबाजारची यंदाची २९ वी अमरनाथ यात्रा नुकतीच उत्साहात व भक्तिमय वातावरणात पार पडली. यात्रेच्या यशस्वी सांगतेनिमित्त दरवर्षीप्रमाणे यंदाही श्री सतीआई संस्थान, शेलूबाजार येथे महाप्रसादाचे आयोजन करण्यात आले होते. या महाप्रसादाचा पंचक्रोशीतील हजारो भाविक बरोबर आमदार श्याम खोडे याच्यासह अनेकांनी महाप्रसादाचा लाभ घेतला.
सकाळपासूनच भाविकांची मोठी गर्दी झाली होती. “जय बाबा बर्फानी’च्या जयघोषाने संपूर्ण परिसर भक्तिमय झाला होता.
महाप्रसादाच्या आयोजनासाठी अमरनाथ यात्रेत सहभागी झालेल्या भक्तांनी विशेष परिश्रम घेतले. स्वयंपाक, भोजन व्यवस्था, पाणी व्यवस्था, स्वच्छता तसेच भाविकांना प्रसादाचे वाटप यासह विविध जबाबदाऱ्या भक्तांनी उत्स्फूर्तपणे पार पाडल्या. सर्वांच्या सहकार्यामुळे महाप्रसादाचा सोहळा शांततेत, शिस्तबद्ध आणि भक्तिमय वातावरणात यशस्वीरीत्या पार पडला.
भंडाऱ्याच्या औचित्याने रक्तदान शिबिर
महाप्रसाद सोहळ्याच्या औचित्याने सामाजिक बांधिलकी जपत रक्तदान शिबिराचेही आयोजन करण्यात आले होते. या शिबिरात १५ रक्तदात्यांनी उत्स्फूर्तपणे रक्तदान करून सामाजिक सेवेचा आदर्श निर्माण केला.
यात्रेतील भक्तांनी एकत्र येत केलेल्या या सेवाभावी उपक्रमाचे पंचक्रोशीतील भाविकांकडून कौतुक करण्यात आले. सेवा, श्रद्धा आणि एकोप्याची परंपरा जपत श्री अमरनाथ भक्त मंडळाने यंदाही महाप्रसाद व रक्तदान शिबिराच्या माध्यमातून भक्तीबरोबरच सामाजिक बांधिलकीचा संदेश दिला.
शेलूबाजार येथील श्री सतीआई संस्थान येथे श्री अमरनाथ भक्त मंडळाच्या वतीने आयोजित महाप्रसादाचा लाभ घेताना भाविक.
