विविध धार्मिक कार्यक्रमांची मेजवानी; २३ जानेवारीला महाप्रसादाने होणार सांगता
सेलू : येथील श्री संत गोविंद बाबा महाराज (दादुपंथी) यांच्या पुण्यतिथी निमित्त मठ संस्थानामध्ये अखंड हरिनाम सप्ताह व प्रवचन सोहळ्याचे आयोजन करण्यात आले आहे. दि. १६ जानेवारी ते २३ जानेवारी २०२६ या कालावधीत हा आध्यात्मिक महोत्सव संपन्न होणार असून, यात विविध धार्मिक कार्यक्रमांची रेलचेल असणार आहे.या अखंड हरिनाम सप्ताहामध्ये दररोज पहाटे ४ ते ६ काकडा भजन, सकाळी ८ ते १० ज्ञानेश्वरी प्रवचन, १० ते १२ गाथा भजन, दुपारी ४ ते ६ ज्ञानेश्वरी प्रवचन, सायंकाळी ६ ते ७ हरिपाठ, रात्री ८ ते ११ कीर्तन आणि रात्री १२ ते पहाटे ४ वाजेपर्यंत ‘हारे जागर’ अशा भरगच्च कार्यक्रमांचे नियोजन करण्यात आले आहे.या सोहळ्यात हभप एकनाथ महाराज हातडीकर, हभप केकते महाराज आंबा, हभप विष्णू महाराज यदलापूरकर, हभप विष्णू महाराज कानडी, हभप प्रभूदेवा यदलापूर आणि श्रीरंग महाराज बाहेगावकर आपली सेवा रुजू करणार आहेत. सप्ताहाची सांगता शुक्रवार, दिनांक २३ जानेवारी रोजी हभप बापुराव महाराज परतूरकर यांच्या काल्याच्या कीर्तनाने व महाप्रसादाने होणार आहे.या मंगलमयी सोहळ्याचा व महाप्रसादाचा जास्तीत जास्त हरिभक्तांनी लाभ घ्यावा, असे आवाहन श्री संत गोविंद बाबा मठ संस्थान, सेलू यांच्या वतीने करण्यात आले आहे.
