सांस्कृतिक कार्यक्रमातून विद्यार्थ्यांनी घडवले कलादर्शन; चित्रकला परीक्षेतील यशस्वी विद्यार्थ्यांचा गौरव
सेलू जि.परभणी : मराठवाडा शिक्षण प्रसारक मंडळ संचालित सेलू येथील न्यू हायस्कूल व उच्च माध्यमिक विभागाचे वार्षिक स्नेहसंमेलन उत्साहात झाले. अध्यक्षस्थानी शालेय समितीचे सदस्य तथा साईबाबा नागरी बँकेचे अध्यक्ष हेमंतराव आडळकर होते. स्थानिक शालेय समितीचे अध्यक्ष तथा जिल्हा परिषद परभणीचे माजी सभापती अशोक काकडे यांच्या हस्ते या स्नेहसंमेलनाचे उद्घाटन झाले. यावेळी मुख्याध्यापक धनंजय भागवत, ॲड.अशोकराव फोफसे, प्राध्यापक विठ्ठल डख, शेषराव नागरे, शरद मगर, रामेश्वर गाडेकर आणि रामेश्वर कदम यांची प्रमुख उपस्थिती होती.यावेळी शासकीय रेखाकला ग्रेड परीक्षेतील यशस्वी विद्यार्थी, कला शिक्षक सुनील मोरे तसेच इयत्ता दहावीतील विद्यार्थिनी सोनम पौळ आणि बारावीचे विद्यार्थी सिद्धार्थ सावंत व अजय तांबे यांचाही गौरव करण्यात आला. सेलू नगरपालिकेच्या स्वीकृत सदस्यपदी निवड झाल्याबद्दल श्री.आडळकर आणि श्री.काकडे यांचा शाळेच्या वतीने सत्कार करण्यात आला. ‘आनंदनगरी’ व ‘शेलापागोटे’ या उपक्रमांसह ३८ विविध गीतांवर विद्यार्थ्यांनी बहारदार नृत्य सादर करून उपस्थितांची मने जिंकली. सूत्रसंचालन जी. के. तोटेवाड यांनी केले तर रामेश्वर गाडेकर यांनी आभार मानले. स्नेहसंमेलन यशस्वी करण्यासाठी प्रणयणा तेलगोटे, डी. एस. मोरे, बाबासाहेब आव्हाड, एस. आर. रोंटेवाड, संतोष कुलकर्णी, भाऊसाहेब निकम, नारायण काष्टे, अंगद मोरे आणि विष्णू गजमल यांच्यासह शिक्षक व शिक्षकेतर कर्मचाऱ्यांनी परिश्रम घेतले.
