महसूल प्रशासनाच्या कारवाईची प्रशंसा अन् टीकेची झोड
सेलू : सेलू तालुक्यातील सोन्ना येथील दुधना नदीच्या किनाऱ्यावर बेकायदेशीरपणे साठवून ठेवलेली तब्बल ५० ब्रास वाळू तहसील प्रशासनाने जप्त केली आहे. तहसीलदार डॉ. शिवाजी मगर यांच्या मार्गदर्शनाखाली करण्यात आलेल्या या कारवाईमुळे रेती तस्करांचे धाबे दणाणले असून, जप्त केलेली ही वाळू लवकरच घरकूल लाभार्थ्यांना मोफत वाटप केली जाणार आहे. सोन्ना शिवारात दुधना नदीकाठी रेतीचे मोठे साठे असल्याची माहिती प्रशासनाला मिळाली होती. त्यानुसार मंडळ अधिकारी सारिका हेगडे व तलाठी सुचित बारवल यांनी तातडीने घटनास्थळी धाव घेऊन पथकाने कारवाई केली. दरम्यान, एकीकडे सोन्ना येथे मोठी कारवाई झाली असताना, दुसरीकडे महसूल विभागाच्या काही पथकांच्या कार्यपद्धतीवर प्रश्नचिन्ह उपस्थित केले जात आहे. मोरेगाव येथे रेती तस्करीवर कारवाई करण्यासाठी गेलेले एक पथक चक्क रस्त्यातील बोरीच्या झाडाखाली बोरे खाण्यात गुंग झाल्याची चर्चा तालुक्यात रंगली आहे. बोरे खाण्याच्या मोहात वेळ गेल्याने तेथे वाळू तस्करांवर कारवाई करण्यात यश आले नाही, अशी मिश्किल टीका नागरिकांमधून होत आहे. दरम्यान, सोन्ना येथील वाळू साठ्याबाबत कोणीही मालकी हक्क सांगण्यासाठी पुढे आले नाही. आर्थिक स्वार्थापोटी तस्करीच्या उद्देशाने हा साठा करण्यात आला असावा, असा अंदाज आहे. या धाडसी कारवाईबद्दल महसूल प्रशासनाचे सर्वत्र कौतूक होत आहे. शासकीय नियमानुसार, जप्त केलेली रेती घऱकूल लाभार्थींना मोफत उपलब्ध करून दिली जाणार आहे. ज्या लाभार्थ्यांना रेतीची आवश्यकता आहे त्यांनी पंचायत समितीकडे तातडीने मागणी करावी, असे आवाहन प्रशासनाकडून करण्यात आले आहे. यामुळे घरकूल बांधकामांना गती येणार आहे.
….. इमेज – प्रातिनिधीक
