६२ वर्षांची परंपरा, देखावा पाहण्यासाठी गणेशभक्तांची गर्दी
सेलू : गणेशोत्सवानिमित्त सेलू (जि.परभणी) शहरासह ग्रामीण भागात गणेश मंडळांनी विविध सामाजिक, सांस्कृतिक कार्यक्रमांवर भर दिला असून, या वर्षी सेलू येथील मारवाडी गल्लीतील श्री रामबाग (रामवाडा) गणेश मंडळाने साकारलेला ‘बारा ज्योतिर्लिंग दर्शन’ भव्य स्वयंचलित देखावा पाहण्यासाठी गणेशभक्तांची सायंकाळी गर्दी होत आहे. नाणे घेऊन अभिषेक करण्याची संधीही उपलब्ध करून देण्यात आली आहे.
रामबाग (रामवाडा) गणेश मंडळाचे हे ६२ वे वर्ष आहे. मंडळाला पौराणिक, ऐतिहासिक व सामाजिक सजीव देखाव्यांची परंपरा लाभलेली आहे. मंडळाच्या श्री केदारनाथ धाम, ३१ फुटी शिवलिंग, “श्री गणेश व श्री कार्तिकेय यांच्या बुद्धी व चातुर्याची परीक्षा” हा स्वयंचलित देखावा तसेच आठ फूट उंच आणि बारा फूट लांबीचा पिसारा फुलवून प्रसाद देणारा मोर या देखाव्याने गणेशभक्तांचे लक्ष वेधून घेतले होते. उत्सवानिमित्ताने गणेश भक्तांना प्रसाद वाटप, भजन संध्या, महिला व मुलामुलींसाठी विविध सांस्कृतिक स्पर्धांना मोठा प्रतिसाद मिळत आहे. रोज सायंकाळी महाआरतीसाठी शहरातील विविध क्षेत्रातील मान्यवर हजेरी लावत आहेत. यावेळी गणेश भक्तांची मोठी गर्दी पाहायला मिळत आहे. श्री बालाजी मंदिर ट्रस्टचे पदाधिकारी सदस्य तसेच गणेश मंडळाचे पदाधिकारी, तरूण पुढाकार घेत आहेत.
