वाशीम जिल्ह्यातील भूमिपुत्राने प्रतिकूल परिस्थितीवर मात करत मिळवली पदोन्नती
वाशीम (फुलचंद भगत) : प्रबळ इच्छाशक्ती, अथक परिश्रम आणि संघर्षाच्या जोरावर कोणत्याही संकटावर मात करता येते, हे वाशीम जिल्ह्यातील मंगरूळपीर तालुक्यातील चांभई येथील भूमिपुत्र दिनेश भास्कर फुके यांनी सिद्ध करून दाखवले आहे. ७५ टक्के दृष्टीहीन असूनही त्यांनी आपल्या जिद्दीच्या जोरावर आयडीबीआय (IDBI) बँकेत ‘असिस्टंट मॅनेजर’ या मानाच्या पदावर पदोन्नती मिळवली आहे.
ते वाशीम येथील रिसोड नाका, पारस प्लाझा कॉम्प्लेक्स मधील बँकेच्या शाखेत आपल्या नवीन पदाचा कार्यभार स्वीकारत आहेत. गेल्या एका दशकापासून स्पर्धा परीक्षांच्या क्षेत्रात संघर्ष करणाऱ्या दिनेश यांनी तीन वर्षांपूर्वी याच बँकेत ‘एक्झिक्युटिव्ह सीएसई’ पदावर यश मिळवले होते. त्यानंतर ते वैजापूर येथील शाखेत अत्यंत प्रामाणिकपणे कार्यरत होते. त्यांच्या उत्कृष्ट कार्याची दखल घेत आता त्यांना थेट ‘असिस्टंट मॅनेजर’ म्हणून बढती देण्यात आली आहे. या यशाबद्दल त्यांना व कुटुंबाला सार्थ अभिमान वाटत आहे.
खडतर तरीही प्रेरणादायी शैक्षणिक प्रवास
दिनेश यांचा शैक्षणिक प्रवास अत्यंत खडतर राहिला. त्यांनी पहिली ते पदव्युत्तर शिक्षणापर्यंतचा टप्पा मोठ्या जिद्दीने गाठला. १ली व २री प्राथमिक शाळा चांभई, ३री ते ६वी कै. गोबरा नाईक अंधनिवासी विद्यालय वाशीम, ७वी डॉ. नरेंद्र भिवापूरकर अंधविद्यालय अमरावती, ८वी ते १०वी भारतीय ज्ञानपीठ विद्यालय मूर्तीजापूर, ११वी व १२वी व्ही. एन. कॉलेज मंगरूळपीर, पदवी (B.A.) सीताबाई कला महाविद्यालय अकोला, तर इतिहास विषयात पदव्युत्तर शिक्षण (M.A.) अमरावती विद्यापीठांतर्गत पूर्ण केले. याशिवाय तांत्रिक शिक्षणात एम-एससीआयटी आणि बेसिक कम्प्युटर टायपिंगचे प्रशिक्षण नाशिक येथील केंद्रात पूर्ण केले.
वडिलांकडून मिळालेला समाजसेवेचा वारसा
दिनेश यांच्या आई श्रीमती निर्मला भास्कर फुके या गावाच्या सरपंच होत्या, मात्र विकासाची आणि समाजसेवेची संपूर्ण कामे त्यांचे वडील पाहत असत. आज वडील हयात नसले तरी, त्यांनी दिलेला समाजसेवेचा वारसा दिनेश अविरतपणे पुढे चालवत आहेत. त्यांना रुग्णसेवेची मनापासून आवड असल्याने गेल्या पाच वर्षांत त्यांनी ५० हून अधिक रक्तदान शिबिरांचे यशस्वी आयोजन केले आहे. भविष्यात शिक्षणापासून वंचित असलेल्या दृष्टीहीन मित्र-मैत्रिणींसाठी विशेष कार्य करण्याचा त्यांचा मानस आहे. याशिवाय त्यांना बुद्धिबळ आणि क्रिकेट खेळण्याचीही विशेष आवड आहे.
या यशाचे श्रेय देताना दिनेश यांनी कुटुंबाचे व मदतीला धावून आलेल्या व्यक्तींचे विशेष आभार मानले आहेत. शिक्षणासाठी काबाडकष्ट करणारी आई आणि भाऊ संदीप भास्कर फुके यांच्या त्यागामुळेच हे यश मिळाल्याचे ते आवर्जून सांगतात. वडिलांच्या निधनानंतर खंबीरपणे पाठीशी उभे राहणारे आतेभाऊ गणेश भास्कर वक्ते यांचेही त्यांनी आभार मानले. तसेच, अभ्यासाच्या काळात ऑडिओ रेकॉर्डिंगसाठी मदत करणाऱ्या ‘क्षितिज विरंगुळा केंद्र’ (अकोला) च्या मंजुश्री गोविंद कुलकर्णी, अवांतर पुस्तकांचे रेकॉर्डिंग करून देणारे चांभईचे प्रफुल तुळशीराम फुके आणि परीक्षेच्या वेळी ‘लेखनिक’ म्हणून मदत करणारे मयूर सुरेश राऊत, आशिष महादेव बरड, सागर नंदू वानखडे, ओमशांती पांडुरंग खंडारे, अमर गजानन कांबे यांचे आभार मानले. याशिवाय विशेष सहकार्य करणारे पांडुरंग कोठाळे, पांडुरंग खंडारे, राम सुर्वे, योगेश मिटकरी, हरिश्चंद्र ठाकरे व सर्व सहकारी मदत करणाऱ्यांचे त्यांनी आभार मानले.
