सेलू तालुक्यातील गोहेगावच्या ग्रामस्थांचे आंदोलन; नवीन शिक्षकांच्या नियुक्तीला तीव्र आक्षेप
आम्हाला आमचे शिक्षक द्या : विद्यार्थ्यांच्या भावना
परभणी, दि.११ : परभणी जिल्ह्यातील सेलू तालुक्यातील गोहेगाव येथे शिक्षकांच्या बदलीवरून वाद निर्माण झाला आहे. शाळेतील शिक्षक जे.ए.धामणगावे आणि जी.आर.बोरगावकर यांची अचानक बदली करण्यात आल्याने ग्रामस्थांनी तीव्र नाराजी व्यक्त केली आहे. त्यांच्या जागी आलेल्या दोन नवीन शिक्षकांपैकी एस.ए.दिवटे आणि बी.एस.भांडे यांच्या कार्यपद्धतीवर ते रूजू होण्यापूर्वीच ग्रामस्थांनी २० ऑगस्ट २०२५ रोजी मुख्य कार्यकारी अधिकारी आणि जिल्हा परिषद शिक्षण विभागाला निवेदन सादर करून तीव्र आक्षेप घेतलेला आहे. दरम्यान, नवीन शिक्षक रूजू झाल्याचे समजताच संतप्त झालेल्या पालक आणि ग्रामस्थांनी ९ सप्टेंबर २०२५ पासून शाळेवर बहिष्कार टाकला आहे. गेल्या तीन दिवसांपासून एकही विद्यार्थी शाळेत हजर झाला नाही.
ग्रामस्थांनी नवीन शिक्षकांची तत्काळ बदली करून, पूर्वीचे शिक्षक जे.ए.धामणगावे आणि श्री. बोरगावकर यांना पुन्हा गोहेगाव शाळेत नियुक्त करण्याची मागणी केली आहे. जोपर्यंत ही मागणी मान्य होत नाही, तोपर्यंत शाळेवरील बहिष्कार सुरूच ठेवण्याचा निर्णय शालेय शिक्षण समिती, ग्रामपंचायत, पालक आणि ग्रामस्थांनी घेतला आहे.
या संदर्भात गोहेगाव येथे आलेले उपशिक्षणाधिकारी गजानन वाघमारे, गटशिक्षणाधिकारी मनोज चव्हाण आणि केंद्रप्रमुख नूर शेख यांना ग्रामस्थांनी निवेदन सादर केले आहे. जर येत्या पाच दिवसांत प्रशासनाने योग्य कार्यवाही केली नाही, तर सेलू येथील तहसील कार्यालयासमोर विद्यार्थ्यासह आमरण उपोषण करण्याचा इशाराही देण्यात आला आहे. विद्यार्थ्यांचे शैक्षणिक नुकसान टाळण्यासाठी प्रशासनाने या प्रश्नावर त्वरित तोडगा काढावा, अशी अपेक्षा ग्रामस्थांनी व्यक्त केली आहे.
” आम्हाला आमचे शिक्षक द्या”
दरम्यान, शिक्षण विभागाच्या अधिकाऱ्यांनी गोहेगाव येथे ग्रामस्थांना भेटून या प्रश्नी मार्ग काढण्यासाठी तातडीने पावले उचलली आहेत. मात्र, अद्यापही शिक्षक बदलीवरून ग्रामस्थांची नाराजी दूर झाली नाही; तर विद्यार्थ्यांनीही ” आम्हाला आमचे शिक्षक द्या” अशा भावनांना तक्रारपेटीद्वारे वाट मोकळी करून दिली आहे, असे समजते.
